Guðmundur Auðun og Haukur Hreinsson til liðs við Vestra

Guðmundur Auðun Gunnarsson og Haukur Hreinsson ásamt Ingólfi Þorleifssyni formanni Kkd Vestra.

Bakverðirnir Guðmundur Auðun Gunnarsson og Haukur Hreinsson skrifuðu nýverið undir samning við Vestra um að leika með liðinu á komandi tímabili.

Guðmundur Auðun Gunnarsson er 27 ára bakvörður alinn upp í Keflavík þar sem hann lék upp yngri flokka og með meistaraflokki. Einnig hefur Guðmundur leikið með FSu og en síðast lék hann með Reyni frá Sandgerði í 1. deild veturinn 2015-2016, þar sem hann skilaði 11,7 stigum að meðaltali í leik. Þótt Guðmundur hafi tekið sér hlé frá körfubolta um hríð er ljóst að hann bætir mikilvægri reynslu í hópinn sem mun án efa hjálpa liðinu í vetur.

Haukur Hreinsson 21 árs leikmaður sem þekkir Jakann inn og út. Hann æfði og lék með KFÍ í yngri flokkum og og meistaraflokki til ársins 2015 þegar hann færði sig til FSu. Þar sem hann lék allt fram á síðasta tímabil með 4,5 stig, 2,6 stoðsendingar og 2,2 fráköst að meðaltali. Haukur er fjölhæfur og öflugur bakvörður sem verður gaman að sjá á aftur á parketinu hér fyrir vestan.

Þeir Guðmundur og Haukur munu einnig sinna þjálfun yngri flokka hjá Vestra. Guðmundur hefur umsjón með 3.-4. bekk stúlkna og minnibolta stúlkna en Haukur sér um þjálfun 7. og 8. flokks stúlkna.

Stjórn Körfuknattleiksdeildar Vestra býður þá félaga velkomna vestur og hlakkar til samstarfsins.