Níundi flokkur stúlkna upp í A-riðil!
Körfubolti | 06.02.2017
Um helgina fór fram fjölliðamót í B-riðli Íslandsmótsins hjá 9. flokki stúlkna í Bolungarvík. Heimastelpur í Vestra mættu KR-b og Val. Vestrastelpur gerðu sér lítið fyrir og unnu riðlinn og tryggðu sér þar með þátttöku í A-riðli í næstu umferð og fá þá tækifæri til að etja kappi við bestu lið landsins í þessum aldursflokki.
Mótið hófst á laugardegi með leik Vestra og KR-b. Leikurinn var jafn en þó voru KR stúlkur skrefinu á undan megnið af leiknum. Örlítið vantaði upp á baráttu og kraft hjá Vestrastelpum til að snúa leiknum sér í vil og hafa sigur. Því fór sem fór, KR-b hafði sigu, 35-43.
Vestrastúlkur léku strax aftur næsta leik og mættu þá Völsurum. Þær voru svo sannarlega ekki af baki dottnar þrátt fyrir tap í fyrsta leik og knúðu fram sigur 49-45 í afar jöfnum og fjörugum leik.
Í lokaleik dagsins mættust svo Valur og KR-b þar sem KR stúlkur höfðu betur 29-39. KR stúlkur voru því í vænlegri stöðu eftir fyrsta daginn með tvo sigra.
Á sunnudeginum mættu Vestrastúlkur KR-b í fyrsta leik dagsins. Stelpurnar mættu gríðarlega ákveðnar til leiks, spiluðu þéttan og góðan varnarleik og boltinn gekk vel á milli leikmanna sem skilaði góðum körfum. Vestrastelpur urðu samt fyrir áfalli snemma í leiknum þegar Katla Sæmundsdóttir, annar af leikstjórnendum liðsins og stigahæsti leikmaður þess fram að þessu, meiddist illa á ökkla og varð að hætta leik. Þetta áfall braut þó ekki á liðinu og var greinilegt að þær ætluðu sér ekkert annað en sigur. Þegar flautað var til leiksloka var sætur sigur því staðreynd Vestri 52 Valur 43.
KR stelpur mættu svo Val í næsta leik en greinilega var nokkuð af þeim dregið eftir hörku leik við Vestra og höfðu Valsstúlkur sigur 47-52 í jöfnum og spennandi leik.
Fyrir lokaleik mótsins þar sem Valur og Vestri mættust var því allt galopið um úrslit riðilsins. Með sigri gátu Vestra stúlkur tryggt sér sigu í riðlinum og þar með þátttöku í A-riðli í næstu umferð á meðan Valsstúlkur þurftu á sigri að halda til að halda sér uppi í B-riðli. Loftið var því spennuþrungið þegar flautað var til leiks enda allt undir hjá báðum liðum. Fljótlega kom þó í ljós að nokkuð var af Valsstúlkum dregið eftir erfiðan leik gegn KR skömmu fyrr. Þær söknuðu einnig þjálfara síns Illuga Auðunssonar sem þurfti að fara suður með hádegisflugi til að ná leika með meistaraflokki Vals gegn Breiðabliki. Leikurinn var samt jafn og spennand og hart barist. Vestrastúlkur höfðu frumkvæðið megnið af leiknum og þótt jafnt hafi verið eftir þriðja fjórðung var ljóst að Vestri ætlaði sér ekki að gefa neitt eftir. Lokatölur 47-53 og sætið í A-riðli tryggt.
Þessar efnilegu stelpur sýndu og sönnuðu eina ferðina enn að þær eiga framtíðina fyrir sér í körfubolta og hafa tekið stórstígum framförum í vetur undir handleiðslu Nökkva Harðarsonar þjálfara og Adams Smára Ólafssonar aðstoðarþjálfara. Þess má svo geta að Nökkvi stýrði liðinu á laugardag en þurfti að ferðast á Selfoss til að spila með meistaraflokki á sunnudag. Það kom því í hlut Guðna Ólafs Guðnasonar að stýra stelpunum seinni daginn sem hann gerði af sinni alkunnu fagmennsku.
Hver einn og einasti liðsmaður Vestra lagði sitt af mörkum í leikjunum og má svo sannarlega tala um liðssigur í því sambandi. En hér að neðan má sjá úrslit og stigaskor í leikjum Vestra.
04-02-2017
KR-b – Vestri 43-35
Katla 12 stig
Helena 10 stig
Rakel 7 stig
Dagbjört 4 stig
Hera 2 stig
04-02-2017
Vestri - Valur 49-45
Katla 17 stig
Rakel 16 stig
Dagbjört 4 stig
Helena 4 stig
Hera 4 stig
Ivana 2 stig
Sædís 2 stig
05.02.2017
Vestri – KR-B 52-43
Rakel 21 stig
Helena 14 stig
Hjördís 8 stig
Hera 3 stig
Ivana 2 stig
Katla 2 stig
Sædís 2 stig
05.02.2017
Vestri – Valur 53-47
Helena 15 stig
Sædís 11 stig
Hjördís 6 stig
Rakel 6 stig
Ivana 5 stig
Hera 5 stig
Dagbjört 4 stig
Natalía 1 stig