Jæja - þá er blakið búið í vetur hjá krökkunum. Slúttað var í strandblaki í blíðskaparveðri á Þingeyri á Uppstigningardag. Þar voru samankomnir krakkar frá Ísafirði, Suðureyri og Þingeyri, um það bil 50 blakarar. Haldið var fjörugt strandblakmót þar sem keppt var á mismunandi stigum í fjögurra manna liðum. Krakkarnir skemmtu sér vel og eiga greinilega auðveldara með að hreyfa sig í sandinum en fullorðna fólkið og ekki verra að geta leikið sér í sandinum á milli leikja. Eftir mótið voru grillaðar pylsur á Víkingasvæðinu og skelltu flestir sér í sund í lokin. Við vonumst til að sjá alla hressa og káta næsta haust. Það er líka tilvalið að grípa í blakbolta í sumar og strandblaksvæðið á Þingeyri er frábært útivistarsvæði fyrir alla fjölskylduna.
Fleiri myndir frá slúttinu eru komnar inn á myndasíðuna.
Þá er komið að því að enda blakvertíðina hjá krökkunum. Slúttið fer fram á Þingeyri á Uppstigningardag, fimmtudaginn 21. maí. Farið verður á einkabílum og lagt af stað frá íþróttahúsinu Torfnesi klukkan 10. Dagskráin verður eftirfarandi:
11-12:30 Strandblakmót hjá krökkunum
12-13 Grillaðar pylsur á Víkingasvæðinu
13-14 Sund fyrir þá sem vilja
NánarBlakfélagið Skellur gerði ljómandi góða ferð á Íslandsmót öldunga í blaki sem haldið var á Seyðisfirði og Egilsstöðum um helgina. Mótið var hið fjölmennasta frá upphafi en 108 lið voru skráð til leiks. A lið kvenna spilaði gott blak svo að eftir var tekið og vann sigur í sinni deild. Þær munu því spila í 5. deild að ári. B liði kvenna gekk ekki eins vel og féllu þær niður í 8. deild, þrátt fyrir mjög góð tilþrif inn á milli.
Karlalið Skells náði glæsilegum árangri og lenti í 2. sæti í sinni deild og færist því upp í 4. deild. Lið Rassskells sem er sameinað lið Tálknfirðinga og Ísfirðinga stóð undir nafni og ýmist rassskellti önnur lið eða lét rassskella sig og endaði um miðja deildina. Úrslitin í heild sinni má sjá hér: http://blak.is/default.asp?page=upplvefur/lokastada.asp
Liðin fengu hús á Seyðisfirði og kvennaliðin gistu í einu húsi og karlaliðin í öðru skammt frá og var göngustígur á milli. Karlarnir voru svo sætir að bjóða konunum í ljúffengan mat á föstudagskvöldinu (alveg óvænt). Eftir það var haldið á Karaoke keppnina þar sem liðin okkar voru með tvö frábær atriði - annað diskó en hitt pönk. Konurnar buðu síðan körlunum í veislu fyrir lokahófið á laugardagskvöldinu og voru þá haldnar ræður, farið yfir atburði mótsins og ýmsar viðurkenningar veittar. Gífurleg stemmning var á lokahófinu eins og alltaf, enda vita allir blakarar að viðlíka stemmning fyrirfinnst hvergi annars staðar.
Það voru þreyttir og sælir blakarar sem lentu á Ísafjarðarflugvelli á sunnudag. Sumir voru komnir heim en aðrir áttu eftir að keyra mislangt. Næsta verkefni verður síðan landsmót UMFÍ sem haldið verður á Akureyri í júli, en stefnt er á að senda blaklið karla og kvenna frá HSV.
Nánar
Þá er komið að því. Stundin sem við höfum beðið eftir frá því á síðasta öldungamóti á Ísafirði í fyrra. Skellur er á leið á öldungamót á Seyðisfirði og Egilsstöðum - Húrraaaa!
Flogið verður í hádeginu á morgun miðvikudegi, millilent í Reykjavík og lent á Egilsstöðum um klukkan 15. Við förum með tvö kvennalið og tvö karlalið héðan frá Vestfjörðum. Þar sem Tálknfirðingarnir voru ekki með nægan mannskap í eitt lið og við ekki í tvö lið, var ákveðið að blanda saman liðunum. Karlarnir fara því með eitt Skells-lið sem er skipað Ísfirðingum og Súgfirðingum og eitt lið sem fékk hið lýsandi nafn "Rassskellur". Í því eru fjórir Tálknfirðingar og þrír Ísfirðingar. Konurnar fara með liðin Skellur A og Skellur B sem spila í 6. og 7. deild. Í liðunum eru Ísfirðingar, Þingeyringar, Súgfirðingur og Tálknfirðingur - góð blanda!
NánarBlakfélagið Skellur sendi eitt lið á Íslandsmót yngriflokka í blaki á Akureyri um síðustu helgi. Það voru þau Alexander, Regína, Daði og Lena sem spiluðu í 4. flokki stig 5, en þá er spilað venjulegt blak með fullorðinsbolta.
Spilaðir voru fjórir leikir á laugardeginum og tveir á sunnudeginum, þetta er fyrsta alvöru mótið sem krakkarnir fara á og stóðu þau sig mjög vel. Þarna voru 74 lið að keppa allsstaðar að af landinu og mikið fjör í húsinu.
Ferðasöguna frá mótinu er hægt að skoða undir tenglinum: krakkablak eða með því að smella hér
Hér að neðan er ferðasaga ótrúlega duglegra blakkrakka sem fóru í ævintýraferð til Ólafsvíkur:
Föstudagur:
Lagt var af stað um klukkan 13:30 frá íþróttahúsinu Torfnesi. Bílstjóri var Friðfinnur frá Þingeyri og var setið í öllum sætum í 25 manna rútunni. Stoppað var einu sinni við eyðibýli í Djúpinu til að pissa - og kom þá í ljós að stelpur nú til dags kunna ekki að pissa úti :-) En eftir smá vangaveltur og nokkrar tilraunir tókst þetta hjá flestum. Stoppað var í sjoppunum á Hólmavík og í Búðardal. Ferðin var löng, milli 8 og 9 klukkustundir, en bíómyndir styttu okkur stundir á leiðinni og var Ívar Tumi tæknimaður ferðarinnar.
NánarFriðfinnur er búinn að fá bróður sinn til að skutlast með sig á snjóbílnum að sækja farangurinn í rútuna. Það er ekki hægt að fara í það alveg strax, en vonandi í dag fyrir myrkur. Friðfinnur mun síðan koma farangrinum hingað í íþróttahúsið á Torfnesi. Þetta ætti því vonandi að verða komið í kvöld, en við munum senda SMS þegar það gerist.
Kveðja,
Harpa
NánarÞá er skemmtilegri og ævintýralegri blakferð lokið og allir þreyttir en vonandi sáttir og sælir. Tekin var ákvörðun um að taka Baldur heim og koma yfir Dynjandis- og Hrafnseyrarheiðar. Við vonuðumst til þess að klárað yrði að moka Hrafnseyrarheiði, en vorum annars með plan B sem var að fá snjóbíl á móti okkur og ferja okkur yfir þennan stutta kafla. Í ljós kom að við þurftum að nota það plan og gekk það mjög vel. Til að flýta ferðinni gengum við af stað á móti snjóbílnum, enda blíða á heiðinni, og skildum farangurinn eftir í rútunni. Tekið skal fram að snjóbíllinn fór gamla vetrarveginn þar sem ekki var snjóflóðahætta á ferð.
Nú hefur verið hætt við að opna Hrafnseyrarheiði fyrir páska þannig að við þurfum að reyna að nálgast farangurinn í rútunni og látum ykkur vita þegar okkur hefur tekist að koma honum hingað til Ísafjarðar.
Setjum inn myndir og nánari ferðasögu mjög fljótlega.
Kveðja, Harpa
Nánar