Strákarnir fara ósigraðir upp í B-riðil og stelpunýliðarnir stimpla sig hressilega inn

Strákarnir í 8. flokki með Hákoni Ara þjálfara og Fjölni Ásbjörnssyni, fararstjóra, þreyttir en ánægðir eftir fyrri keppnisdaginn í Njarðvík.

Nökkvi Harðarson þjálfari leggur línurnar fyrir fyrsta leik 8. flokksstúlknanna í Hafnarfirði á laugardag.

1 af 2

Það var svo sannarlega nóg að gera hjá krökkunum í 8. flokkum KFÍ um helgina þegar önnur umferð Íslandsmótsins fór fram. Stelpurnar mættu í Hafnarfjörð en leið strákanna lá í Njarðvík. Skemmst er frá því að segja að strákarnir unnu alla sína leiki og eru þar með komnir í B-riðil. Stelpurnar unnu tvo af þremur leikjum sínum í C-riðli sem er frábær árangur í ljósi þess að meirihluti liðsins samanstendur af nýliðum sem byrjuðu fyrst að æfa körfu nú í haust.

Stelpurnar eiga mikið inni

Víkjum fyrst sögunni að stelpunum en mótið í C-riðlinum var haldið á heimavelli Hauka á Ásvöllum.  Allir þrír leikir mótsins fóru fram á laugardeginum og hóf KFÍ leik gegn Valsstúlkum og það í hörkuleik. Eftir þrjá leikhluta var staðan hnífjöfn 17-17 en þá settu KFÍ stúlkur í næsta gír og sigldu flottum sigri heim 23-19 eftir mikla baráttu á báðum endum vallarins.

Í öðrum leiknum gegn Haukum var sama harka og áður og mikil barátta hjá báðum liðum. Fyrir fjórða og síðasta leikhlutann munaði aðeins tveimur stigum á liðunum 15-17 Haukastúlkum í vil. Á þessum tímapunkti voru KFÍ stúlkur orðnar átta talsins eftir meiðsli sem komu upp í leiknum og voru auk þess komnar í villuvandræði. Haukar notuðu breiddina sína vel og tóku öll völd í fjórða leikhluta og unnu 10 stiga sigur á KFÍ stúlkum 19-29. Stelpurnar okkar eiga þó greinilega mikið inni ef marka má frammistöðuna í fyrstu þremur leikhlutunum.

Í þriðja og síðasta leik mættu KFÍ stúlkur B liði Vals og voru KFÍ stúlkur staðráðnar í því að gera betur en á móti Haukastúlkunum. Í þessum leik sýndi KFÍ hörku og dugnað og gáfu Valsstúlkum ekkert eftir. KFÍ stúlkur voru mun ákveðnari og voru 6 til 8 stigum yfir allan leikinn og tóku frekar þægilegan sigur á Val B 22-17.

Þjálfari KFÍ stúlknanna er Nökkvi Harðarson og er hann að ná einstaklega góðum árangri með bæði 7. flokk og 8. flokk kvenna en yngri stelpurnar komust einmitt upp í A-riðil í síðustu umferð Íslandsmótsins sem fram fór á Ísafirði fyrir skömmu. Þess má reyndar geta að Hákon Ari Halldórsson, þjálfari 8. flokks drengja, aðstoðar Nökkva á fjölmennum stúlknaæfingunum og eru þeir félagar mjög samstíga í þjálfun þessa aldurshóps, sem telur um 30 einstaklinga.

Nökkvi er að vonum ánægður með nýafstaðna helgi og sigrana tvo hjá stelpunum en margar þeirra byrjuðu fyrst að æfa körfubolta nú í haust: „Þetta er frábært afrek þar sem flestar stelpurnar í þessum flokki eru að stíga sín fyrstu skref í körfubolta og körfuboltamótum. Framtíðin er svo sannarlega björt í verstfirskum kvennakörfubolta ef fram fer sem horfir.“

Strákarnir  ósigraðir en það var tæpt á tímabili

Og þá að frammistöðu strákanna í 8. flokki sem Hákon Ari stýrir af miklum myndarbrag en strákarnir eru ósigraðir eftir fyrstu tvær umferðirnar á Íslandsmótinu. Hópurinn samanstendur af fjórum strákum fæddir 2002 og fimm fæddir 2003, þar af eru tveir Strandastrákar sem eðli máls samkvæmt æfa ekki að staðaldri með félögum sínum.

Tveir leikir fóru fram á laugardeginu og var fyrri leikurinn á móti Snæfelli. Reyndist sá leikur auðveldari en við var búist og voru okkar menn fljótt komnir með talsvert forskot og sigruðu örugglega.

Snæfell 16 – KFÍ 56

Hilmir 31

Hugi 12

Blessed 8

Egill 4

Daði 3

Friðrik 2

Seinni leikur laugardagsins var á móti Þór Akureyri og urðu miklar sviptingar í þeim leik. Okkar menn byrjuðu illa á móti ákveðnum Þórsurum og vissu ekki hvernig þeir áttu að bregðast við varnarleik andstæðingsins og voru sjálfir ekki nógu vakandi í vörninni. Strákarnir að norðan voru brátt komnir með gott forskot og létu okkar menn mótlætið fara í taugarnar á sér, sem ekki varð til að bæta stöðuna.  Hákon þjálfari las mönnum pistilinn í leikhléi og mættu strákarnir betur stemmdir og ákveðnir í Í þriðja leikhluta. Sýndu þeir mikinn karakter þegar þeir smám saman söxuðu á forskot Þórsaranna og í fjórða leikhluta var þetta bara orðin spurning um hversu stór sigurinn yrði.

Þór Ak. 29 – KFÍ 52

Hilmir 25

Hugi 14

Egill 11

Blessed 4

Sunnudagurinn hófst á leik á móti Njarðvík sem hafði unnið alla sína leiki fram að þessu. Það er skemmst frá því að segja að strákarnir okkar byrjuðu afspyrnu illa og virtust hreinlega ekki vera vaknaðir. Njarðvíkingarnir spiluðu vel og náðu nokkru forskoti þótt okkar menn væru aldrei langt á eftir en fyrri hálfleikur leit alls ekki vel út hjá þeim. Virtist jafnvel sem fyrsti ósigurinn lægi í loftinu hjá KFÍ-strákunum en þeir voru ekki tilbúnir til að játa sig sigraða og mættu af fullum krafti í seinni hálfleik og sneru leiknum sér í hag. Voru þeir komnir með örugga forystu undir lok fjórða leikhluta og dugðu tvær þriggja stiga körfur Njarðvíkinga á lokamínútunni ekki til að vinna upp það forskot.

Njarðvík 40 – KFÍ 46

Hilmir 26

Hugi 16

Blessed 2

Egill 2

Fjórði og síðasti leikurinn var á móti Grindavík. KFÍ-strákarnir mættu vel stemmdir í þennan leik og spiluðu flottan körfubolta. Voru þeir yfir megnið af leiknum og náði Grindavík aðeins að halda í við þá í fyrsta leikhluta en eftir það juku strákarnir smám saman forskotið og unnu leikinn örugglega. Spennandi verður að sjá hvernig strákarnir standa sig í B-riðlinum eftir áramót en nokkuð víst má telja að þar mæti þeir mun sterkari andstæðingum en raunin hefur verið til þessa í vetur.

Grindavík 43 – KFÍ 61

Hilmir 33

Egill 8

Blessed 7

Hugi 7

Friðrik 4

James 3

Gnúpverjar urðu undir mulningsvélinni

Florijan er með 36,5 stig per leik í 3. deildinni.

Vestfirska mulningsvélin, betur þekkt sem KFÍ-b, hélt áfram sigurgöngu sinni í 3. deild karla í gær þegar liðið bar sigurorð af Gnúpverjum 88-79.

Útileikir og einn heimaleikur um helgina

Birgir Örn Birgisson og lærisveinar hans mæta Skallagrímsmönnum á morgun í "Fjósinu".

Karlalið KFÍ mætir Skallagrími í „Fjósinu“ í Borgarnesi á morgun föstudaginn 27. nóvember kl. 19:15. Borgnesingar eru með sterkt lið og hafa unnið þrjá leiki af fimm það sem af er tímabilinu. Það má þó búast við því að KFÍ liðið fái góðan stuðning af áhorfendapöllunum í „Fjósinu“ því liðinu fylgja bæði 8. flokkur stúlkna og drengja.

Sætir sigrar hjá sjöunda flokki

Lið KFÍ sem keppti í B-riðli Íslandsmóts 7. flokks stúlkna um helgina ásamt Nökkva Harðarsyni þjálfara.

Um hádegisbilið í gær lauk keppni í B-riðli Íslandsmóts stúlkna í 7. flokki hér á Ísafirði. Mótherjar KFÍ stúlkna í riðlinum voru KR, Njarðvík B og sameiginlegt lið Tindastóls og Þórs Akureyri. Skemmst er frá því að segja að KFÍ stúlkur gerðu sér lítið fyrir og unnu alla sína leiki og fara því upp í A-riðil í næstu umferð. Þetta er í fyrsta sinn síðan 2011-2012 sem KFÍ á lið í A-riðli á Íslandsmóti yngri flokka en þá lék 9. flokkur stúlkna megnið af vetrinum í A-riðli. Stelpurnar og Nökkvi Harðarson þjálfari þeirra eiga því sannarlega hrós skilið fyrir frábæran árangur. Nú er bara að halda áfram að bæta leik liðsins og byggja ofan á þennan góða árangur. Jakinn-TV mætti á svæðið í gær og hér að neðan má sjá glefsur úr úrslitaleik KFÍ gegn Tindastól/Þór.

Laugardagur

Í fyrsta leik riðilsins mættu KFÍ stelpur KR. Það var mikil spenna fyrir þennan leik enda fór síðasta viðureign liðanna í framlengingu sem endaði með sigri KR. Eins og við var að búast var leikurinn hnífjafn og mikil barátta í báðum liðum. Eftir æsispennandi lokamínútur höfðu KFÍ stelpur sigur með einu stigi 25-24. Rakel skoraði 9 stig, Katla 8, Gréta, Hrafnhildur Guðný og Sara skoruðu 2 stig hver og Helena 1. Aðrar komust ekki á blað í stigaskorinu en börðust eins og ljón í vörn og sókn og lögðu sitt af mörkum. Góður liðssigur gegn sterku liði KR.

Í síðari leik dagsins mættust Njarðvík B og Tindastóll/Þór. Í þeim leik kom glögglega í ljós styrkur norðanstúlkna sem hafa innanborðs mjög sterka einstaklinga. Svo fór að Tindastóll/Þór vann öruggan sigur 51-3, þrátt fyrir að vera aðeins með sjö leikmenn.

Sunnudagur

KFÍ mætti Njarðvík B í fyrsta leik dagsins. Njarðvíkurstúlkur mættu ákveðnar til leiks eftir erfitt tap gegn Tindastól/Þór á laugardag og spiluðu vel á köflum. KFÍ var þó alltaf skrefi á undan og lauk leiknum með nokkuð öruggum sigri KFÍ, 24-14. Rakel skoraði 6 stig, Helena og Snæfríður 4 stig hvor, Katla og Sædis skoruðu 3 stig, Sara 2 stig og Júlíana og Viktoría settu niður sitthvort stigið.

Næst mættust KR og Tindastóll. Leikurinn var nokkuð jafn framan af en Tindastóll/Þór sýndi styrk sinn og vann öruggan sigur 41-18. Með þessum úrslitum var orðið ljóst að næsti leikur mótsins, þar sem Tindastóll/Þór mætti heimastúlkum í KFÍ, yrði úrslitaleikur um sigur í riðlinum.

Lokaleikur KFÍ var eins og við var að búast æsispennandi og var hart barist. Stúlkurnar að norðan leiddu leikinn með fáum stigum í fyrri hálfleik en KFÍ stelpur hleyptu þeim aldrei langt á undan sér. Í seinni hálfleik var aðeins farið að draga af Tindstól/Þór, enda höfðu þessar kraftmiklu stelpur spilað erfiðan leik skömmu áður þar sem einn leikmaður slasaðist. Í loka fjórðungnum var fámennt lið norðanstúlkna þeirra komið í nokkur villuvandræði enda voru KFÍ stelpur duglegar að sækja að körfunni sem skilaði villum og vítaskotum. En til marks um ákefðina og kraftinn í Tindstólsstúlkum þá gerði leikmaðurinn sem slasaðist gegn KR sér lítið fyrir og spilaði megnið af loka fjórðungnum. Þegar leiktíminn var úti var staðan jöfn og því þurfti að grípa til framlengingar. Í framlengingunni var lið KFÍ heldur sterkara enda farið að draga af leikmönnum Tindstóls/Þórs á meðan Nökkvi þjálfari KFÍ var duglegur að skipta inn á og dreifa álaginu. Lokatölur eftir framlengingu 35-29 KFÍ í vil og sæti í A-riðli tryggt.

Rakel skoraði 14 stig í leiknum. Katla 11, Snæfríður 3, Gréta, Hrafnhildur Una og Sara 2 stig hver og Helena 1 stig. Allt liðið barðist vel í leiknum!.

Í lokaleiknum komu stelpurnar í Njarðvík B svo á óvart og sigruðu KR í baráttuleik 18-21 og því ljóst að KR leikur í C-riðli í næstu umferð.

Aldrei fleiri á Boltaskólamóti

Fjölmenni var á mótinu og margir foreldrar fylgdust áhugasamir með.

Strákarnir í 1.-2. bekk og jafnöldrur þeirra í baksýn með Helga Hrafni þjálfara Boltaskólans.

Stelpurnar í 3.-4. bekk voru stærsti hópurinn á mótinu.

1 af 3

Um eða yfir sjötíu börn tóku þátt í Boltaskólamóti KFÍ og HSV sem fram fór á Torfnesi á laugardag. Mótið markaði lok fyrsta af þremur körfuboltatímabilum í íþróttaskóla HSV en mótið var opið öll börnum í 1.-4. bekk. Sjaldan hafa fleiri sótt viðburð ætluðum þessum aldurshópi á vegum KFÍ.

Það voru þjálfarar yngri flokka félagsins sem skipulögðu daginn í samstarfi við barna- og unglingaráð og fengu til liðs við sig nokkra félaga úr meistaraflokki karla svo allt færi vel fram. Börnin fóru í ýmsa leiki og spiluðu 3 á 3 á milli þess sem þau stukku í pásur og gæddu sér á ferskum ávöxtum. Allir voru síðan eystir út með ís og endurskinsmerkjum í lok móts. Samkaup, Íslandsbanki og Umboðsverslun Hafsteins fá bestu þakkir fyrir stuðninginn við daginn.

Sérstaklega ánægjulegt var hversu vel foreldrar sóttu mótið og fylgdumst með af áhuga allan tímann. Þökkum við þeim kærlega fyrir komuna. Verið er að uppfæra æfingatöflu félagsins til að koma betur til móts við yngri flokka félagsins og verður hún aðgengileg hér á síðunum síðar í dag. Við hvetjum áhugasama til að kynna sér töfluna og kanna hvort þar er ekki eitthvað í boði sem hentar yngstu kynslóðinni á heimilinu.

Háspennuleikur gegn Blikum

Það var gaman að sjá minnibolta krakkana leiða leikmenn KFÍ inn á völlinn á leiknum.

Kjartan Helgi var stigahæstur leikmanna KFÍ með 22 stig.

Christopher Andersson skoraði 21 stig og tók 11 fráköst.

1 af 3

Það var góð stemmning á Jakanum fyrir leik KFÍ og Breiðabliks í gærkvöldi. Stúkan þéttsetin og sú skemmtilega nýbreytni tekin upp að yngri iðkendur, að þessu sinni minniboltakrakkar, leiddu leikmenn KFÍ inn á völlinn. Leikurinn var líka bráðfjörugur og spennandi allt fram á lokamínúturnar. En á þessum lokamínútum reyndust Blikar bæði sterkari og skynsamari og höfðu því sigur 85-91.

KFÍ tekur á móti Breiðabliki

Florijan og Nökkvi í baráttunni. Ljósmynd: Jónas Ottósson / ÍA.

Eftir tvo útileiki í röð er loksins komið að heimaleik á ný hjá KFÍ þegar Breiðablik mætir í heimsókn á Jakann á morgun föstudag. Leikurinn hefst að vanda kl. 19:15.

Fjölliðamót á Ísafirði í 7. flokki stúlkna

Stelpurnar í 7. flokki KFÍ á fyrsta fjölliðamótinu í haust.

Um helgina fer fram önnur umferð í Íslandsmóti 7. flokks stúlkna og nú eru það stelpurnar í 7. flokki KFÍ sem eru gestgjafar í B-riðli. Gestirnir koma víða að en þeir eru KR, Njarðvík b og sameiginlegt lið Tindastóls og Þórs Akureyri. Mótið hefst kl. 16 á laugardag og því lýkur um kl. 13 á sunnudag.

Boltaskólamót KFÍ og HSV á laugardag

Á laugardaginn kemur, 21. nóvember, verður haldið skemmtilegt körfuboltamót í íþróttahúsinu á Torfnesi ætlað kátum krökkum í 1.-4. bekk. Mótið mun standa frá 11-13 en inn í það verður blandað leikjum, stuði og stemmingu.

Eimreiðin gengur enn – KFÍ-b enn ósigraðir!

Eins og alþjóð veit þá hefur B-lið KFÍ verið að taka Íslandsmótið með stormi á síðustu vikum og hafði fyrir helgina byrjað tímabilið á þremur öruggum sigrum í röð í 3. deildinni. Í hverjum leik hefur dregin hefur verið dreginn á flot, líkt og strandaður hvalur af strönd, hver fræknari kempan úr sögu KFÍ á fætur annari. Í leik liðsins á helginni var engin breyting á því.