KFÍ lýkur keppni í Lengjubikar karla

Florijan Jovanov. Mynd: Ingvi Stígsson

KFÍ lauk keppni í Lengjubikar karla með tapi fyrir úrvalsdeildarliði Grindavíks í gær. Grindvíkingar höfðu fyrir leikinn tryggt sér sigur í D-riðli bikarsins og mæta Stjörnunni í 8. liða úrslitunum.

KFÍ mætir Grindavík

Á sunnudaginn kemur, þann 27. september, mætir KFÍ úrvalsdeildarliði Grindavíkur í lokaleik D-riðils í Lengjubikarnum hér á heimavelli. Leikurinn hefst kl. 16:00.

Þrír KFÍ þjálfarar útskrifast af þjálfaranámskeiði

Hákon Ari, Nökkvi og Gunnlaugur ásamt þeim Stefáni Arnarssyni, Snorra Erni Arnaldssyni og Ágústi Björgvinssyni, sem leiðbeindu á námskeiðinu.

Þrír þjálfara frá KFÍ útskrifuðust úr þjálfaranámskeið 1a sem KKÍ stóð nýverið fyrir. Á 1 a námskeiðinu er lögð áhersla á þjálfun byrjenda og barna. Einkum var horft til kennslu á helstu grunnþáttum eins og skotum, sendingum, fótavinnu, knattraki og boltaæfingar auk þess að kenna yngstu iðkendum grunnþætti í gegnum leiki.

Íslandsmeistarar KR koma í heimsókn

Ljósmynd: Ingvi Stígsson.

Lengjubikarinn er kominn af stað og fyrsti heimaleikur KFÍ fer fram laugardaginn 19. september kl. 16:00 og er ekki af verri sortinni. Þá mæta sjálfir Íslandsmeistarar KR á Jakann með Evrópumótsfarann Pavel Ermolinskij í broddi fylkingar. 

Pistill formanns: Gleðjumst yfir leiknum – gleymum dómurunum

Ingólfur Þorleifsson, formaður KFÍ.

Kæru stuðningsmenn og iðkenndur.

Nú er körfuboltatímabilið nýhafið og ríkir mikil tilhlökkun meðal leikmanna og stjórnar KFÍ að takast á við verkefni komandi vetrar. Við vonumst auðvitað eftir góðum stuðningi Ísfirðinga og nærsveitunga á heimavelli í vetur líkt og í gegnum tíðina. Stuðningur ykkar er ómetanlegur fyrir félagið og er hann límið í þeirri umgjörð sem oft og tíðum hefur gert Jakann að öflugasta heimavígi landsins.

Nú í upphafi tímabilsins langar mig að deila með ykkur þeirri stefnu sem ég vil að við öll, leikmenn og stuðningsmenn, tökum varðandi samskipti við þá dómara sem koma til með að dæma hjá okkur í vetur. Mér hefur verið bent á að Ísafjörður sé meðal þeirra staða sem skeri sig úr þegar kemur að skítkasti í garð dómara. Í gegnum árin hef ég ekki verið barnanna bestur og látið dómara heyra það ef ég er ekki sáttur. Ég hef hinsvegar komist að því að það hefur hvorki skilað mér né KFÍ nokkrum sköpuðum hlut. Því er undirritaður nú kominn í það persónulega verkefni að hætta afskiptum af störfum dómara. Það mun án efa taka á að stilla sig en ég er kominn á þá skoðun að það skili okkur meiru að dómurunum líði vel í vinnunni á okkar heimavelli. Ég vil með þessum orðum fara fram á það við ykkur, iðkendur og stuðningsmenn, að koma fram við dómara af virðingu. Þetta er vanþakklátt og erfitt starf sem óþarfi er að gera enn erfiðara með skítkasti og leiðindum. Eitt getum við verið viss um, leikmaður sem er með hugann við dómgæsluna er ekki með hugann við það sem skiptir máli – sjálfan leikinn. Hið sama gildir um okkur áhorfendur, óhróður í garð dómara er ekki hvatning til liðsins okkar. Tökum stuðningsmenn Íslenska landsliðsins í Berlín á Evrópumótinu okkur til fyrirmyndar og látum stuðninginn við KFÍ einkennast af gleði yfir leiknum sem við elskum. Önnur hlið á þessu máli er svo sú að við fullorðna fólkið verðum að sýna börnunum gott fordæmi. Þau hafa ekkert með að læra þessa hegðun enda smitast þetta inn í leik þeirra séu þau iðkendur.

Með von um áframhaldandi góðan stuðning á Jakanum. Áfram KFÍ!

Ingólfur Þorleifsson,

formaður KFÍ

Kjartan Helgi semur aftur við KFÍ

Kjartan Helgi og Ingólfur Þorleifsson, formaður KFÍ við undirritun samningsins.

Bakvörðurinn Kjartan Helgi Steinþórsson hefur samið við KFÍ um að leika með liðinu á ný á komandi tímabili.

Kjartan er uppalinn hjá Grindvíkingum þar sem hann varð bikarmeistari árið 2014. Hann lék einnig í þrjú ár í Bandaríkjunum í mennta- og háskólaboltanum. Kjartan var ekki lengi að finna sig á Ísjakanum því hann skoraði 22 stig í sínum fyrsta leik þar á móti Tindastól í Lengjubikarnum síðastliðið haust. Hann var með rúmlega 12 stig að meðaltali í leik í deild og bikar á síðata tímabili.

Leikmenn meistaraflokks KFÍ

Birgir Örn Birgisson þjálfari KFÍ og lærisveinar hans hefja tímabilið á morgun með leik gegn Val. Á laugardag fer svo fram fyrsti heimaleikurinn gegn Íslandsmeisturum KR.

Eins og fram hefur komið hér á síðunni, í vor og sumar, hafa orðið nokkrar breytingar á leikmannahópi KFÍ undanfarið. Í stuttu máli má segja að hópurinn hafi breikkað þótt öflugir leikmenn hafi einnig horfið af sjónarsviðinu. Hér á eftir fer kynning á öllum leikmönnum liðsins.

Útlileikur gegn Val

Úr leik Vals og KFÍ á Hlíðarenda í 1. deildinni á síðasta tímabili. Ljósmynd: Ingvi Stígsson.

KFÍ hefur tímabilið með útileik gegn 1. deildar liði Vals á Hlíðarenda í Lengjubikarnum á morgun, fimmtudaginn 17. september. KFÍ leikur í D-riðli Lengjubikarsins en þar leika einnig, auk Vals, úrvalsdeildarliðin Grindavík, ÍR og Íslandsmeistarar KR.

Fyrsti  heimaleikurinn er einmitt gegn sjálfum Íslandsmeisturnum laugardaginn 19. september. En meira um þann leik síðar.

Samið við Helga Hrafn og Helga Bergsteinsson

Ingólfur Þorleifsson, formaður og Helgi Hrafn Ólafsson.

Ingólfur Þorleifsson og Helgi Bergsteinsson.

1 af 2

Að lokinni æfingu í gærkvöldi hjá meistaraflokki karla var nóg að gera hjá formanninum Ingólfi Þorleifssyni að skrifa undir samninga. Auk Daníels Þórs Midgley skrifuðu einnig undir samninga í þeir Helgi Hrafn Ólafsson og Helgi Bergsteinsson.

Helgi Hrafn Ólafsson er uppalinn á Ísafirði en flutti ungur að árum suður í Kópavog þar sem hann æfið körfuknattleik með Breiðabliki en auk Blika hefur Helgi Hrafn leikið með Laugdælum þar sem hann varð 2. deildar meistari 2010. Hann hefur verið virkur í félagsstarfi Blika, setið í stjórn og þjálfað í yngri flokkum en hér vestra hefur Helgi Hrafn einmitt tekið til við þjálfun yngstu iðkennda KFÍ og hefur hann umsjón með Krílakörfunni og Krakkakörfunni í vetur.

Helgi Bergsteinsson er uppalinn í KFÍ. Helgi er fæddur árið 1996 og hóf meistaraflokksferil sinn með KFÍ í úrvalsdeildinni árið 2014. Hann átti nokkrar góðar innkomur í leikjum síðasta tímabils og verður gaman að fylgjast með þessum unga leikmanni áfram.

Daníel Þór Midgley semur við KFÍ

Ingólfur Þorleifsson formaður og Daníel Þór Midgley.

Að lokinni góðri æfingu í gærkvöldi samdi bakvörðurinn knái Daníel Þór Midgley við KFÍ. Daníel er uppalinn í KFÍ og á að baki 42 leiki með félaginu í 1. deild og úrvalsdeild.