KFÍ og Strandamenn í samstarf

Myndarlegur hópur körfuboltastráka en hópurinn er í reynd enn stærri en nokkrir voru forfallaðir á sunnudagsæfingunni.

Yngri flokkar KFÍ og Héraðssamband Strandamanna munu sameina krafta sína í vetur í tveimur aldurshópum drengja, 10. flokki og 8. flokki. Að minnsta kosti fjórir Strandamenn keppa með flokkunum á Íslandsmótum vetrarins, tveir í hvorum aldurshópi. Samtals telur hópurinn hátt í 20 stráka.

Blásið var til sameiginlegra æfinga beggja flokka nú um helgina og var æft á Torfnesi bæði laugardag og sunnudag en þjálfarar drengjanna eru Nebojsa Knezevic og Hákon Ari Halldórsson, Einnig aðstoðaði Nökkvi Harðarson við æfingar helgarinnar en hann þjálfar einmitt stóran hóp 7. flokks stúlkna KFÍ.

Öllum sem stóðu að æfingum helgarinnar bar saman um að vel hefði tekist til. Barna- og unglingaráð KFÍ væntir  mikils af samstarfinu við Strandamenn og lofar helgin góðu í þeim efnum. Það voru Körfuboltabúðir KFÍ í vor sem kveiktu þá hugmynd að láta strákana keppa saman í vetur en þrír af þeim sem nú eru gegnir til liðs við KFÍ tóku einmitt þátt í þeim búðum.

Haustfjarnám 2015: 1. og 2. stig þjálfaramenntunar ÍSÍ

Haustfjarnám 1. og 2. stigs þjálfaramenntunar Íþrótta- og Ólympíusambands Íslands mun hefjast mánudaginn 28. september nk. Námið stendur yfir í átta vikur á 1. stigi en fimm vikur á 2. stigi. Nám beggja stiga er allt í fjarnámi, engar staðbundnar lotur og gildir námið jafnt fyrir allar íþróttagreinar. Námið hefur verið afar vinsælt undanfarin ár og nemendur komið úr fjölmörgum íþróttagreinum.

Þjálfaramenntun ÍSÍ veitir réttindi til íþróttaþjálfunar og jafnframt rétt til áframhaldandi náms til frekari réttinda.
Þátttökugjald á 1. stig er kr. 25.000. Öll námskeiðsgögn eru innifalin og send á heimilisföng nemenda.
Þátttökugjald á 2. stig er kr. 22.000.

Skráning er á namskeid@isi.is eða í síma 514-4000 og þarf henni að vera lokið fyrir föstudaginn 25. september. Með skráningu þarf að fylgja fullt nafn, kennitala, heimilisfang, netfang og símanúmer og taka þarf skýrt fram á hvaða stig verið er að skrá. Rétt til þátttöku á 1. stigi hafa allir sem lokið hafa grunnskólaprófi.

Fyrir nánari upplýsingar um fjarnámið og aðra þjálfaramenntun ÍSÍ má hafa samband við :
Viðar Sigurjónsson vidar@isi.is eða í síma 460-1467 / 863-1399

Birgir Björn til Þýskalands

Birgir Björn í baráttunni á síðasta tímabili. Ljósmynd: Baldur Smári Ólafsson.

Eins og fram hefur komið í fjölmiðlum í dag hefur miðherjinn sterki Birgir Björn Pétursson ákveðið að söðla um og reyna fyrir sér í atvinnumennsku. Það var ánægulegt fyrir KFÍ að fá Birgi Björn aftur heim á síðasta tímabili, og njóta krafta hans á parketinu á Jakanum á ný, en það er ekki síður ánægulegt að sjá þennan öfluga leikmann taka skrefið út í hinn stóra heim. KFÍ óskar Birgi Birni góðs gengis á nýjum vígstöðvum.

Búningamátun fyrir yngri flokka

Nú líður að því að KFÍ taki nýja búninga í notkun en allt stefnir í að félagið keppi undir merkjum KFÍ í vetur þar sem stofnun nýja íþróttafélagsins, Vestra, hefur tafist nokkuð.

Boðið verður upp á mátun á næstu dögum fyrir yngri flokka félagsins og fer hún fram í íþróttahúsinu á Torfnesi nú á laugardag kl. 11-13 og á mánudag kl. 16-18. Búningarnir greiðast við afhendingu síðar í haust og kosta 9.000 krónur. Foreldrar og forráðamenn eru hvattir til að nýta sér þetta tækifæri til mátunar og pöntunar nú þar sem ekki liggur fyrir hvenær pantað verður á nýjan leik.

Rífandi stemmning á Körfuboltadeginum

Yngstu iðkendurnir sýndu góð tilþrif á laugardaginn undir leiðsögn Björgvins og annarra meistaraflokksmanna.

Körfuboltakempurnar Sigríður Guðjónsdóttir og Stefanía Ásmundsdóttir mættu galvaskar á Körfuboltadaginn með börnunum sínum.

1 af 2

Hátt í 100 krakkar kíktu við á Körfuboltadaginn hjá okkur á Torfnesi á laugardaginn og hafa þeir sjaldan verið fleiri. Rífandi stemmning var í salnum en það voru leikmenn meistaraflokks karla ásamt þjálfurum yngri flokka sem héldu utan um leiki og ýmsar boltastöðvar. Sumir iðkendur hrepptu veglega vinninga í stinger og 3. stiga keppnum og allir fóru heim með plakat af íslenska landsliðinu í körfubolta sem hóf einmitt leik gegn Þýskalandi rétt í þann mun sem Körfuboltadeginum lauk.

Foreldrar og forráðamenn fjölmenntu með krökkunum og var ánægjulegt að sjá mörg ný andlit í þeim hópi. Það er von Barna- og unglingaráðs að sem flest áhugasöm börn láti verða af því að kíkja á æfingar hjá viðeigandi aldurshópum. Það kostar foreldra ekkert að leyfa yngstu krökkunum að æfa körfubolta og nýir iðkendur í minnibolta eldri og uppúr æfa gjaldfrjálst fyrstu tvo mánuðina. Farið verður á minniboltamót við hæfi hvers aldursflokks í vetur en krakkar í 7. flokki og eldri taka þátt í Íslandsmótum KKÍ.

Barna- og unglingaráð þakkar meistaraflokki fyrir aðstoðina á laugardaginn og sömuleiðis þökkum við að þessu sinni sérstaklega tveimur dyggum styrktaraðilum yngri flokkanna en það eru Samkaup og H.V. Umboðsverslun á Ísafirði.

Körfuboltadagur KFÍ á laugardaginn

Hinn árlegi Körfuboltadagur KFÍ verður haldinn á laugardaginn kemur, 5. september og stendur frá 11-13. Dagurinn markar upphaf vetrartímabilsins í yngri flokkum félagsins en þar gefst krökkum á öllum aldri tækifæri til að kynna sér körfuboltaíþróttina, fara í skemmtilega leiki, spreyta sig á boltastöðvum og fá upplýsingar um æfingatíma vetrarins. Liðsmenn úr meistaraflokki karla ásamt þjálfurum yngri flokka sjá um að allir skemmti sér vel.

Í vetur verður boðið upp á æfingar fyrir börn allt frá fjögurra ára aldri og er æft í alls tíu flokkum, bæði stúlkna og drengja. Æft verður í þremur íþróttahúsum á svæðinu, á Torfnesi og Austurvegi á Ísafirði og í íþróttahúsinu í Bolungarvík.

Heitt verður á könnunni á laugardagsmorgun og eru foreldrar og forráðamenn hvattir til að koma með börnum sínum, fá sér kaffibolla í góðum félagsskap og kynna sér starfsemi félagsins. Hollar og góðar veitingar verða á hliðarlínunni og bjóðum við alla velkomna.

Æfingatafla KFÍ 2015-2016

Æfingatafla KFÍ veturinn 2015-2016 er nú tilbúin en alls er æft í 11 flokkum í vetur, allt frá meistaraflokki karla til barna á leikskólaaldri í Krílakörfunni og Íþróttaskóla Árna Heiðars. Æfingar allra flokka hefjast samkvæmt æfingatöflu næstkomandi mánudag, 31. ágúst.

KFÍ krakkar í úrvalsbúðum KKÍ

Efri röð f.v.: Helena Haraldsdóttir, Sara Kristín Gunnsteinsdóttir og Rakel Damilola Adeleye . Miðröð f.v.: Dagbjört Ósk Jóhannsdóttir, Júlíana Lind Jóhannsdóttir, Katla María Sæmundsdóttir og Sædís Mjöll Steinþórsdóttir. Neðsta röð: Sara Emily Newman og Viktoría Rós Þórðardóttir. Á myndina vantar Hrafnhildi Unu Magnúsdóttur og Snæfríði Árnadóttur.

Þessir þrír, Hugi og Hilmir Hallgrímssynir og Egill Fjölnisson tóku þátt í Úrvalsbúðunum í Dalhúsum um helgina en þeir eru fæddir 2002.

1 af 2

Um helgina fór fram seinni æfingalota ársins í úrvalsbúðum KKÍ fyrir krakka sem fæddir eru 2002, 2003 og 2004, auk afreksbúða fyrir krakka sem fædd eru 2001. Fréttaritari KFÍ í höfuðborginni kíkti á æfingu hjá stelpunum og smellti mynd af þeim að lokinni góðri æfingu. 

KKÍ þjálfaranámskeið 1a verður haldið helgina 28-30 ágúst

Áhersla er lögð á þjálfun minnibolta, byrjenda og barna 12 ára og yngri. Áhersla er lögð á kennslu á helstu grunnþáttum eins og skotum, sendingum, fótavinnu, knattraki og á boltaæfingar. Áhersla er lögð á að kenna yngstu iðkendum grunnþætti í gegnum leiki.

Dagskrá:
Föstudagur – Íþróttamiðstöð Laugardal 
17:00-17:30 Setning og kynning á þjálfaravef FIBA Europe Ágúst - Bóklegt
17:30-18:20 Skipulag þjálfunar og kennslufræði (yngri en 12 ára) Ágúst - Bóklegt
18:20-18:40 Matarhlé
18:40-20:00 Minnibolti og þjálfun barna Snorri - Bóklegt

Laugardagur – Íþróttahús Álftanesi
09:30-10:50 Sendingatækni, fótavinna og leikir Ágúst - Verklegt 
11:00-12:20 Boltaæfingar, knattrak, leikir og fótavinna Stefán - Verklegt
12:20-13:00 Matarhlé
13:00-14:20 Skottækni, fótavinna og leikir Ágúst - Verklegt
14:40-16:00 Vörn (Varnarstöður 1, 2, 3, 4 og 5) Stefán - Verklegt

Sunnudagur - Íþróttahús Álftanesi
09:30-10:50 Úrvalsbúðir KKÍ Ágúst – Bóklegt/Verklegt
11:00-12:20 Upphaf sóknar, V-hlaup (e. V-cut), sendingar og sniðskot Snorri - Verklegt
12:20-13:00 Matarhlé
13:00-14:20 Umræður (KKÍ 1b), próf (10%) Bóklegt/Verklegt
14:30-16:30 Verklegt próf (7,5%) og munnlegt próf (7,5%) Verklegt 

Fyrirlesarar eru Ágúst Björgvinsson, Snorri Örn Arnaldsson og Stefán Arnarson

Skráning á námskeiðið fer fram á kki@kki.is og er námskeiðisgjald 18.000 krónur.

Stelpubúðir Helenu Sverris og Hauka

Áhugaverðar búðir hjá Helendu Sverris vinkonu okkar og félögum í Haukum.