Enn eitt naumt tap

Birgir Björn á ferðinni undir körfunni í gær. Hann var stigahæstur heimamanna með 19 stig. Ljósmynd: Baldur Smári Ólafsson.

Hann var ekki mikið fyrir augað leikur KFÍ og Hamars í 1. deild karla í gærkvöldi. Bæði lið áttu slakann leik en því miður var leikur heimamanna snöggt um verri og því lauk honum með sigri gestanna 65-69.

Tveir leikir framundan

Strákarnir mæta Hamri á föstudag og stelpurnar Tindastól á laugardag. Ljósmynd: Benedikt Hermannsson.

Um helgina fara fram heimaleikir bæði hjá karla- og kvennaliði KFÍ. Karlaliðið mætir Hamri frá Hveragerði í 1. deild karla, föstudaginn 30. janúar kl. 19.15, og kvennaliðið mætir Tindastól frá Sauðrárkróki í 1. deild kvenna laugardaginn 31. janúar kl. 16:00.

Hamarsmenn eru með sterkt lið sem er til alls líklegt og situr í þriðja sæti deildarinnar. Gengi þeirra í upphafi árs, undir stjórn nýs þjálfara Hallgríms Brynjólfssonar, hefur reyndar verið missjafnt en í síðustu umferð sigruðu þeir Þór Akureyri sannfærandi og eru því e.t.v. komnir á beinu brautina á ný. Það verður ekki annað sagt en að gengi okkar manna hafi einnig verið brokkgeng á nýju ári en KFÍ liðið hefur ýmist átt skínandi góða leiki eða arfaslaka. Í ljósi gengis liðanna í síðustu leikjum má ætla að einbeiting og dagsform skeri úr um sigurvegarann.

Á laugardaginn mæta KFÍ konur svo liði Tindastóls en liðin hafa þegar mæst einu sinni í vetur og þá unnu okkar stúlkur stórsigur á Skagfirðingum á útivelli 46-71. Sá leikur hefur þó ekkert að segja um helgina enda má ætla að Tindastólsstúlkur mæti mun sterkari til leiks en í fyrri leiknum þar sem þær hafa nælt sér í nýjan Kana, Tikeyia Ann Johnson, sem fór mikinn í fyrsta leik sínum með liðinu í síðustu umferð gegn Fjölni og skoraði 29 stig. Tindastólsstúlkur eru því sýnd veiði en ekki gefin og má ætla að framlag annarra leikmanna en Kananna í liðunum muni skera úr um sigurvegara leiksins.

Að vanda verður svo fírað upp í Muurikka pönnunni fyrir leikinn á föstudagskvöld og boðið upp á ljúffenga hamborgara og á laugardaginn verður sjoppan að sjálfsögðu opin með góðum veitingum.

Tveir spennandi leikir sem við hvetjum alla stuðningsmenn KFÍ til að sækja!

LEIK FRESTAÐ! Stelpurnar mæta toppliði Njarðvíkur

Labrenthia Murdock spilandi þjálfari KFÍ hefur leikið vel í vetur og er stigahæsti leikmaður deildarinnar með 27 stig að meðaltali í leik.

LEIK FRESTAÐ!
Ágætu stuðningsmenn!
Vegna slæms veðurútlits seinnipartinn í dag laugardag og á morgun hefur móststjórn KKÍ í samráði við félögin ákveðið að fresta leik KFÍ og Njarðvíkur í 1. deild kvenna sem fram átti að fara í dag kl. 16:30..
Nýr leiktími er væntanlega í mars en verður að sjálfssögðu auglýstur nánar síðar.

Kvennalið KFÍ mætir Njarðvík í 1. deildinni laugardaginn 24. janúar kl. 16:30 á Torfnesi. Njarðvíkur stúlkur sitja á toppi deildarinnar með fullt hús stiga og hafa því ekki enn tapað leik. Það verður því við ramman reip að draga á laugardaginn en okkar stúlkur hafa verið á mikilli siglingu undanfarið og hafa sigrað þrjá leiki í röð og sitja nú í þriðja sæti deildarinnar.

Hvetjum alla til að mæta á Jakann og styðja við bakið á stelpunum!

Alexandra gengin til liðs við KFÍ

Alexandra í leik með Blikum á síðasta tímabili. Ljósmynd: Facebook síða Breiðabliks.

Miðherjinn Alexandra Sif Herleifsdóttir er gengin til liðs við KFÍ. Alexandra hefur leikið með kvennaliði KFÍ í haust í gegnum venslasamning við Breiðabliki en hefur nú fært sig alfarið yfir til KFÍ. Hún er uppalin í Breiðabliki og lék með liðinu síðasta tímabil þegar Blikastúlkur sigruðu 1. deildina og unnu sér keppnisrétt í úrvalsdeild. Á síðasta tímabili með Blikum var Alexandra með 7,1 stig og 6,4 fráköst að meðaltali í leik. Hún hefur átt við nokkuð erfið meiðsli í hnéi að stríða síðustu ár en hefur á yfirstandandi tímabili með KFÍ stöðugt verið að bæta leik sinn og aukið framlag sitt. Í síðasta leik gegn Fjölni reif hún t.d. niður 13 fráköst og skoraði 7 stig en að meðaltali hefur hún tekið 7 fráköst og skorað 5 stig með KFÍ.

Stjórn KFÍ býður Alexöndru velkomna til KFÍ og hlakkar til að sjá hana vaxa enn frekar sem leikmaður það sem eftir lifir tímabilsins.

Góður útisigur og stórleikur hjá Nebojsa

Nebojsa Knezevic átti sannkallaðan stórleik og skoraði hvorki meira né minna en 43 stig

KFÍ vanna annan leikinn í röð þegar strákarnir lögðu Breiðablik á útivelli í kvöld með 94 stigum gegn 81. Nebojsa Knezevic átti sannkallaðan stórleik og skoraði hvorki meira né minna en 43 stig auk þess að taka 5 fráköst, stela boltanum 5 sinnum og efa 3 stoðsendingar. Það gekk allt upp hjá Nebojsa í kvöld því hann var með 83% þriggja stiga nýtingu og 86% tveggja stiga nýtingu. Sannkallaður stórleikur hjá honum!

Pance átti einnig góðan leik og skoraði 20 stig, Björgvin setti 8 stig, Birgir Björn og Jóhann Jakob 6 stig hvor, Gunnlaugur 5 og Andri Már, Birgir þjálfari og Florian voru hver og einn með 2 stig.

Hjá heimamönnum skiptist stigaskorið nokkuð jafnt en stigahæstir voru þeir Egill Vignisson og Pálmi Geir Jónsson með 14 stig hvor.

Nánari upplýsingar um tölfræði leiksins má nálgast á vef KKÍ.

Mikil gleði á Körfuboltadegi KFÍ

Hópurinn með bolina góðu frá Landflutningum og KKÍ.

Pizzurnar smökkuðust vel.

Hollustan í fyrirrúmi í pásunni og allt í boði Samkaupa.

Elstu iðkendurnir í góðum gír.

1 af 4

Körfuboltadagur KFÍ var haldinn með pomp og prakt á laugardaginn var og tóku hátt í 50 krakkar úr yngri flokkum félagsins þátt í honum. Barna- og unglingaráð stóð fyrir deginum sem hófst á æfingabúðum fyrir 8-15 ára krakka undir stjórn Labrenthiu Murdock, þjálfara og leikmanns meistaraflokks kvenna og Nebojsa Knezevic, leikmanns meistaraflokks karla. Leikmenn úr báðum meistaraflokkum félagsins aðstoðuðu einnig við þjálfunina og tókust búðirnar afar vel en markmiðið með þeim var að auka tækni og boltafærni iðkenda og skemmta sér í leiðinni.

Kristín Hálfdánsdóttir, svæðisstjóri Landflutninga/Samskipa á Ísafirði kom færandi hendi og gaf öllum iðkendum búðanna æfingaboli en bolirnir eru liður í öflugu samstarfi KKÍ og Landflutninga um eflingu yngri flokka körfuboltans um allt land.

Að búðunum loknum var boðið uppá pizzuveislu og að því búnu tók við fyrri leikur meistaraflokks karla sem fékk Þór Akureyri í heimsókn þessa helgi. Það var því sannkölluð körfuboltastemming á Torfnesi alla síðastliðna helgi. Ljóst er að margir ungir og efnilegir leikmenn leynast í yngri flokkum félagsins og verður spennandi að fylgjast með gengi flokkanna okkar á næstu misserum. Framundan eru bæði fjöllliðamót og minniboltamót en þar ber hæst Nettómótið í Reykjanesbæ sem fer fram helgina 6.-8. mars næstkomandi. Stefnt er að því að fara með sem flesta KFÍ iðkendur á Nettó líkt og gert hefur verið síðustu ár en mótið er ætlað iðkendum sem fæddir eru árið 2004 og síðar. 

Sigur í háspennuleik!

Birgir Björn Pétursson var maður dagsins í dag en hann tryggði sigur á lokasekúndu leiksins.

Karlalið KFÍ lagði Þór frá Akureyri í seinni leik liðanna í dag í algjörum háspennuleik á Jakanum. Þetta var mikill baráttuleikur og hnífjafn enda réðust úrslitin ekki fyrr en á síðustu sekúndunni þegar Birgir Björn setti niður skot eftir góða sendingu frá Nebosja. Úrslitin 75-74 KFÍ í vil og Birgir Björn maður dagsins!

Líkt og í gær hóf KFÍ leikinn betur og leiddi allan fyrri hálfleikinn, mest með 14 stigum. Í síðari hálfleik komust gestirnir svo betur inn í leikinn og jöfnuðu skömmu eftir að hálfleikurinn hófst og komstu svo fljótlega yfir. Eftir það var leikurinn í járnum og liðin skiptust á að leiða með fáum stigum ef ekki var jafnt. Lokasekúndurnar voru svo æsispennandi eins og sjá má í meðfylgjandi myndbandi frá KFÍ-TV. Vic Ian Damasin setti niður tveggja stiga körfu þegar 9 sekúndur voru eftir af leiknum og kom gestunum yfir 73-74. Nebosja var snöggur að koma boltanum í leik og Pance geystist fram völlinn og fann Nebosja aftur sem gerði atlögu að körfunni, dró í sig fjóra leikmenn Þórsara, og fann Birgi Björn lausan undir körfunni. Birgi brást svo ekki bogalistinn og lagði boltann í körfuna þegar aðeins ein sekúnda var eftir.

Sigurinn í dag var kærkominn eftir svekkjandi tap gærdagsins. Nebosja, Birgir Björn og Pance voru bestu menn KFÍ en einnig var ánægulegt að sjá ungan leikmann KFÍ, Helga Bergsteinsson, koma inn á með miklum látum, setja þrist, frákasta og berjast vel. Þar er á ferð efnilegur leikmaður sem heldur vonandi áfram á þessari braut. Hjá gestunum var Frisco Sandidge bestur, og trúlega besti maður vallarins líkt og í gær.

Nebosja var stigahæstur heimamanna í dag með 27 stig, 8 fráköst, 5 stoðsendingar og 4 stolna bolta. Næstur kom Birgir Björn með 22 stig og 10 fráköst. Pance var líka drjúgur með 18 stig og 5 fráköst. Helgi Bergsveinsson átti góða innkomu með 6 stig, 6 fráköst, 2 stoðsendingar og 3 stolna bolta. Jóhann Jakob var með 2 stig og 6 fráköst.

Hjá gestunum var Frisco Sandidge lang bestur með 25 stig og hvorki meira né minna en 20 fráköst auk 4 stoðsendinga og 3 stolinna bolta. Næstur kom Arnór Jónsson með 16 stig, Vic Ian með 13 en aðrir með minna.

Ítarleg tölfræði leiksins er aðgengileg á vef KKÍ.

Tap í fyrri leiknum gegn Þór

Panche fór fyrir leikmönnum KFÍ í dag.

Karlalið KFÍ tapaði fyrri leiknum af tveimur þessa helgina í baráttuleik við Þór Akureyri. Leikurinn endaði 71-77 gestunum í vil.

KFÍ hóf leikinn af miklum krafti með góðri pressuvörn sem skilaði sjö stiga forskoti þegar fyrsti leikhluti var úti. Þórsarar mættu ákveðnir til leiks í öðrum leikhluta og náðu að þétta vörnina verulega sem hafði það í för með sér að KFÍ skoraði aðeins 10 stig í leikhlutanum og heimamenn leiddu aðeins með þremur stigum í hálfleik. Þriðji leikhluti var svo hnífjafn og enn leiddu heimamenn með þremur stigum þegar honum lauk. Botninn datt svo algjörlega úr leik KFÍ síðasta leikhlutanum. Flest allar aðgerðir KFÍ voru fyrirsjáanlegar og einfalt fyrir Þór að verjast einstaklingsframtakinu sem var ráðandi í sóknarleiknum, mikið knattrak og lítið flæði í spilamennsku liðsins. Fyrsti sigur Þórs í deildinni því staðreynd.

Panche átti góðan leik og Nebojsa var einnig drjúgur.  Birgir Björn var að vanda öflugur í fráköstunum. Framlag annara leikmanna var töluvert minna.

Frisco Sandidge var þó maður vallarins og framlag hans fyrir Þórsliðið var frábært, skoraði mikilvægar körfur, var öflugur í fráköstum og í vörninni.  Átti heilt yfir skínandi leik.

Það voru ljósir punktar í leik KFÍ í dag svo sem pressuvörnin í upphafi. Þó er ljóst að menn verða að koma mun ákveðnari til leiks á morgun til að landa sigri og halda einbeitingu út leikinn og sömu ákefð og var fyrir hendi í upphafi leiks.

Ítarlega tölfræði má nálgast á vef KKÍ.

Tveir heimaleikir gegn Þór Akureyri

Birgir Örn Birgisson og strákarnir hans taka á móti Þór frá Akureyri í tveimur leikjum um helgina.

Það verður í nógu að snúast hjá leikmönnum karlaliðs KFÍ um helgina en strákarnir mæta liði Þórs frá Akureyri í tveimur leikjum á Torfnesi á sunnudag og laugardag kl. 14:00. Í 1. deildinni eru leiknar þrjár umferðir og til að spara ferðakostnað munu Þórsarar leika báða útileiki sína við KFÍ í sömu ferðinni.

Liðin mættust á Akureyri síðast í nóvember á Akureyri og þá fóru okkar menn með sigur af hólmi. Þetta eru afar mikilvægir leikir en með sigri í báðum leikjum getur KFÍ híft sig upp í fimmta sæti deildarinnar.

Báðir leikirnir hefjast sem fyrr segir kl. 14:00. Við hvetjum alla til að mæta og styðja við bakið á strákunum í þessum mikilvægu leikjum! 

Þeir sem ekki sjá sér fært að mæta á leikina geta að sjálfsögðu fylgst með þeim í beinni á KFÍ-TV.

Gunnlaugur genginn til liðs við KFÍ

Gunnlaugur Gunnlaugsson á siglingunni í leik með UMFB. Ljósmynd: Ingvi Stígsson.

Haukur Hreinsson hefur ákveðið að söðla um og er gengin til liðs við FSu. Ljósmynd: Ingvi Stígsson.

1 af 2

Gunnlaugur Gunnlaugsson framherji er genginn til liðs við KFÍ. Gunnlaugur er uppalinn í KFÍ og steig sín fyrstu skref með félaginu í yngri flokkum. Hann spilaði með meistaraflokki KFÍ veturinn 2005-2006 og lék alls 20 leiki með meistaraflokki á árunum 2005-2009. Gunnlaugur hefur stundað æfingar með Ármanni í Reykjavík í haust en lék síðast með UMFB í 2. deild karla tímabilið 2011-2012 þar sem hann skoraði að meðaltali 14 stig í leik og var með 10 fráköst.

Þá hefur Haukur Hreinsson ákveðið að söðla um en hann flutti um áramótin á Selfoss og gekk til liðs við FSu. Haukur var með 3,0 stig og 2,7 fráköst að meðaltali í 9 leikjum með KFÍ í vetur.