Fjórir KFÍ leikmenn í landsliðshópum

Þau gleðilegu tíðindi bárust á föstudaginn var að fjórir leikmenn KFÍ hafa verið valdir í æfingahópa fyrir yngri landslið KKÍ fyrir árið 2015.

Hinn bráðefnilegi framherji/miðherji Haukur Rafn Jakobsson, leikmaður 9. flokks drengja KFÍ, var valinn í æfingahóp U15 liðs drengja sem Jóhannes A. Kristbjörnsson þjálfar.

Þrjár stúlkur úr hinum efnilega meistaraflokki kvenna eru svo í æfingahópum kvennalandsliðanna. Framherjinn Saga Ólafsdóttir var valin í æfingahóp U15 liðs kvenna sem er þjálfað af Helenu Sverrisdóttur og Ingvari Þór Guðjónssyni. Bakvörðurinn Linda Marín Kristjánsdóttir var valin í U16 lið kvenna sem Margrét Sturlaugsdóttir þjálfar en Linda var einmitt síðasta vetur í æfingahópi U15 liðs kvenna. Eva Margrét Kristjánsdóttir var valin í æfingahóp U18 liðsins sem Jón Guðmundsson þjálfar en Eva hefur áður bæði æft og spilað með U16 og U18 liðin auk þess sem hún hefur verið valin í æfingahóp A-landsliðsins.

Það er sannarlega gaman að eiga svona glæsilega fulltrúa KFÍ á vettvangi landsliða KKÍ. Stjórn KFÍ óskar þessum efnilegu iðkendum innilega til hamingju með árangurinn.

Tap gegn Hamri á útivelli

Mynd: ingvi.stigsson.is

Í gærkvöldi lék karlalið KFÍ við Hamar í Hveragerði. Þar sem ekki var flogið neyddust strákarnir til að keyra alla leið í Hveragerði. Aksturinn og saman klemmdar fætur hafa líklega haft sitt að segja fyrir strákana því leikurinn tapaðist 110-82.

Í liði KFÍ var Nebojsa atkvæðamestur líkt og svo oft áður í vetur en hann skoraði 26 stig. Birgir Björn skilaði sínu og skoraði 16 stig og tók 9 fráköst. Florijan átti einnig góðan dag en hann setti 11 stig og var með 100% nýtingu í skotum sínum og 75% nýtingu í vítum.

Hjá Hamri voru þeir Þorsteinn Gunnlaugsson og Julian Nelson atkvæðamestir hvor um sig með 27 stig. Snorri Þorvaldsson var með 16 og Bjarni Rúnar Lárusson með 11.

Nánari tölfræði leiksins má nálgast á vef KKÍ.

Næsti leikur KFÍ er útileikur gegn FSu á Selfossi á morgun sunnudaginn 30. nóvember.

Góður sigur gegn Tindastóli en tap gegn Þór

Hluti af æfingahóp kvennaliðsins á æfingu.

Kvennalið KFÍ lék tvo útileiki í 1. deildinni um helgina gegn liðum á norðurlandi. Stelpurnar byrjuðu á því að mæta Þór á Akureyri á laugardaginn en sennilega hefur ferðlagið norður setið í þeim því sá leikur tapaðist 61-46. Á sunnudaginn mættu þær svo Tindastól á Sauðárkróki og unnu stórsigur 46-71. Þetta er fyrsti sigur stelpnanna í deildinni og er hann sannarlega kærkominn. Það er því ljóst að stelpurnar eru í mikilli framför og hlökkum við til að sjá þær mæta FSU/Hrunamönnum þann 7. desember hér heima.

Þór - KFÍ 61-46

KFÍ stelpur áttu góða spretti í leiknum og var jafnræði með liðunum framan af. Í þriðja leikhluta lentu lykilleikmenn KFÍ í villuvandræðum. Labrenthia fór útaf með fimm villur í þriðja leikhluta og snemma í fjórða leikhluta fór Eva Margrét útaf.

Stigaskor: Eva Margrét 24 stig, Labrenthia 14 stig, Guðrún Edda 4 stig og Rósa 4 stig. Aðrar sem spiluðu en voru ekki með stig voru Linda Marín, Hekla, Hlín og Saga.

Tindastóll - KFÍ 46-71

Þetta var frábær leikur hjá stelpunum þar sem allt small saman. Þær spiluðu sem ein liðsheild og frábært að sjá hvað þær náðu vel saman. Í þessum leik voru allir leikmenn að gera góða hluti bæði í vörn og sókn sem skilaði sér í sætum sigri.

Stigaskor: Eva Margrét 29 stig, Labrenthia 23 stig, Guðrún Edda 9 stig, Saga 4 stig, Hlín 4 stig, Linda Marín 2 stig. Aðrir leikmenn sem spiluðu en náðu ekki að skora vour Hekla og Rósa.

Því miður eru upplýsingar um stigaskor og aðra tölfræði ekki tiltækar en við uppfærum þessa frétt um leið og þær berast.

Baráttusigur á Valsmönnum

Birgir Björn átti góðan leik í dag. Ljósmynd: Halldór Sveinbjörnsson.

Karlalið KFÍ fór með sigur af hólmi á Jakanum fyrr í dag gegn Valsmönnum í 1. deildinni. Þetta var kærkominn sigur á heimavelli og með honum er ísinn brotinn. Leikurinn var jafn og spennandi allan tímann en undir lokinn sýndu okkar strákar baráttu og yfirvegun sem skilaði sigri.

Líkt og svo oft áður í vetur voru okkar menn seinir í gang og Valsarar leiddu í upphafi leiks. Á fimmtu mínútu náði Nebosja að jafna leikinn með því að setja niður skot undir körfunni, fá villu að auki og klára vítið. Valsarar komust aftur yfir en KFÍ menn náðu góðum spretti og leiddu með tveimur stigum 19-17 þegar fyrsti fjórðungur var úti.

Valsarar fóru betur af stað í öðrum fjórðungi, voru fljótir að jafna og leiddu leikinn allt þar til að Florijan Jovanov kom KFÍ yfir með góðri þriggja stiga körfu á fimmtándu mínútur og kom KFÍ í 25-24. Florijan hafði komið inn á skömmu áður og hleypti miklum krafti í KFÍ liðið með baráttu og hvatningu. Birgir Björn átti svo frábæran kafla síðustu fimm mínútur hálfleiksins og setti niður 8 stig inn í teignum. KFÍ leiddi því í hálfleik 37-33.

Í byrjun seinni hálfleiks náðu Valsmenn að jafna en í stöðunni 40-40 setti Pance niður þriggja stiga skot og í kjölfarið kom góður kafli hjá KFÍ. Þar munaði miklu um gott framlag frá Björgvin Snævari Sigurðssyni sem tók tvö sóknarfráköst og setti fjögur stig með stuttu millibili auk þess að berjast vel í vörninni. Valsarar náðu smám saman að komast aftur inn í leikinn og jöfnuðu 51-51 á þrítugustu mínútu og leiddu með einu stigi 53-54 þegar fjórðungurinn var úti.

Líkt og hina fjórðungana komu Valsarar aftur sterkari inn í upphafi þess fjórða og bættu í forystuna. Mest komust þeir í átta stiga forskot 54-62 á þrítugustu og fimmtu mínútu. Birgir þjálfari KFÍ brá þá á það ráð að beita pressuvörn sem virtist koma Valsmönnum nokkuð úr jafnvægi og skilaði KFÍ nokkrum stolnum boltum. Síðustu sex mínútur leiksins stjórnuðu okkar menn leiknum og sýndu yfirvegun, skynsemi og baráttu sem skilaði að lokum góðum sigri 71-62.

Nebojsa átti góðan leik í dag líkt og svo oft áður. Hann setti niður 24 stig tók 8 fráköst og gaf 5 stoðsendingar. Birgir Björn átti líka góðan leik skoraði 21 stig og tók 13 fráköst. Pance Ilievski setti 11 stig og Björgvin Snævar 9.

Hjá gestunum var Illugi Auðunsson bestur en hann skoraði 15 stig og tók 12 fráköst. Danero Thomas kom næstur með 14 stig 9 fráköst og 4 stoðsendingar.

BREYTTUR LEIKTÍMI! KFÍ mætir Valsmönnum heima

Það er komið að næsta heimaleik en karlalið KFÍ mætir val hér heima í 1. deild karla laugardaginn 22. nóvember kl. 14:00 ATH breyttur leiktími vegna þess að flugi var aflýst. Valsmenn fóru vel af stað í vetur og unnu þrjá af fyrstu fjórum leikjum sínum en töpuðu í síðustu umferð gegn ÍA.

Að vanda verður svo fírað upp í Muurikka pönnunni klukkan 18:30 og boðið upp á ljúffenga hamborgara.

Þeir sem ekki sjá sér fært að mæta á leikinn geta að sjálfsögðu fylgst með leiknum í beinni á KFÍ-TV.

9. flokkur drengja stóð sig vel

9. flokkur drengja ásamt Nebojsa þjálfara og þeim Virijevic feðgum

Síðastliðna helgi fór 9. flokkur drengja til Njarðvíkur og spiluðu þrjá leiki í fjölliðamóti.

Uppskeran var einn stórsigur, eitt naumt tap og annað aðeins stærra.  Miklar framfarir frá síðasta móti.

Leikur#1  Höttur-KFI 50-35

Leikurinn byrjar ágætlega, við héldum vel í við Austanmenn, staðan var eftir fyrsta leikhluta 10 - 10, annan leikhluta 18 - 21 og allt í járnum.  Aðeins farið að draga í sundur eftir  þriðja leikhluta, staðan 28 - 34.  Hattarmenn sýndu síðan styrk sinn og unn leikinn nokkuð örugglega, lokastaðan 35 - 50.
Stigin:

14 Haukur Jakobsson 24

4 Tryggvi Fjölnisson 5

6 Daníel Wale 2

11 Runar Guðmndsson 2

12 Hugi Hallgrímsson 2 
5 Egill Fjölnisson 0
10 Þorleifur Ingólfsson 0 
15 Hilmir Hallgrímsson 0
16 Blessed Parilla 0

Leikur #2  Njarðvík-KFI 54-48

Næstu andstæðingar voru Njarðvík.  Okkar menn mæta tilbúnir í leikinn og var þetta hinn mesti hörkuleikur þar sem jafnt var nær á öllum tölum en Njarðvíkingar sigu fram úr í þriðja en við náðum að minnka muninn en ekki nægilega, úrslit hefðu hæglega geta fallið okkar megin, hinn fræga herslumun vantaði bara.  Leikur þróaðist með eftirfarandi hætti, staðan í lok hvers fjórðungs:

11 - 12, 23 - 26, 33 - 42, 48 - 54

Stigin:

14 Haukur 28

6 Daniel 9

12 Hugi 7

11 Rúnar 1

Leikur#3  KFI 63 - Árman 33

Stórsigur í síðasta leik.  Strákar spila virkilega vel, gott samspil, fín vörn og allt til fyrirmyndar, þróun leiks var með eftirfarandi hætti:

16 - 9, 29 - 22, 42 - 26 og lokastaðan 63 - 33

Stigin:

14-Haukur-23p

15-Hilmir-13p

6-Daniel-9p

5-Egill-4p

11-Rúnar-4p

12-Hugi-4p

4-Tryggvi-2p
10-Þorleifur-2p
16-Blessed-2p

Ágætis árangur hjá strákum, framfarir greinilegar.  Einn sigur uppskeran og tvö frekar naum töp.  Til gamans má geta að fyrrverandi þjálfari drengjanna og núverandi leikmaður Njarðvíkur Mirko Stefán Virijevic mætti og hvatti drengina.  Strákarnir afar kátir með að hitta Mirko.

Samningur við Klofning undirritaður

Nafnarnir Guðni Einarsson og Guðni Guðnason undirrita samninginn.

Á leiknum gegn Breiðabliki síðastliðinn föstudag undirrituðu Guðni A. Einarsson framkvæmdarstjóri Klofnins ehf á Suðureyri og Guðni Ólafur Guðnason gjaldkeri KFÍ samstarssamning KFÍ og Klofnings. Fyrirtækið Klofningur hefur verið einn aðal styrktaraðili KFÍ frá 2010. Samningurinn sem undirritaður var síðastliðinn föstudag er til eins árs og er framlenging á fyrri samningi.

Enn eitt tapið á heimavelli

Nebojsa Knezevic átti góðan leik á föstudag en það dugði ekki til að landa sigri.

KFÍ tapaði gegn Breiðablik í 1. deild karla síðastliðinn föstudag. Líkt og svo oft í vetur var það hlutskipti KFÍ strákanna að elta gestina sem komust fljótlega yfir og héldu forystunni út leikinn. Okkar strákar voru samt alltaf inn í leiknum og misstu gestina aldrei langt fram úr sér. En það vantaði áræðni og kraft til að taka leikinn yfir og ná undirtökunum.

KFÍ mætir Breiðabliki - ATh! Leikur fer fram, dómarar og Breiðablik koma akandi

Pance Ilievski mætir bróður sínum, Borce Ilievski þjálfara Breiðabliks, í leiknum á morgun.

KFÍ tekur á móti Breiðablik í 1. deild karla föstudaginn 14. nóvember kl. 19.15. Blikar hafa farið ágætlega af stað í vetur, sigrað tvo leiki en tapað tveimur. Okkar menn lögðu Þór frá Akureyri á útivelli í síðustu umferð svo þetta verður án efa hörkuleikur.

Fyrsti sigur tímabilsins!

Birgir Björn átti góðan leik á móti Þór frá Akureyri í dag líkt og Nebojsa, en báðir skoruðu þeir 23 stig.

KFÍ vann sinn fyrsta sigur í vetur í fyrstu deild karla með sigri á liði Þórs frá Akureyri.  Þór Akureyri, eins og KFÍ var búið að tapa öllum sínum leikjum í vetur. Fyrirfram var búist við baráttuleik sem varð raunin.  Leikurinn fór að lokum 68-80 KFÍ í vil.