Vorfjarnám 1. 2. og 3. stigs þjálfaramenntunar ÍSÍ

Vorfjarnám þjálfaramenntunar ÍSÍ hefst í febrúar eins og undanfarin ár.  Fjarnám 1. stigs hefst mánudaginn 17. febrúar og nám á 2. og 3. stigi hefst mánudaginn 24. febrúar.  Sérstök athygli er vakin á því að nám á 3. stigi er nú í fyrsta sinn í boði hjá ÍSÍ.  Fjölmargir þjálfarar hafa útskrifast af 2. stigi undanfarin ár og hafa því möguleika nú á að halda áfram námi og auka við réttindi sín.

Nám allra stiga er almennur hluti fagþekkingar íþróttaþjálfara og gildir jafnt fyrir allar íþróttagreinar.  Sérgreinahluta námsins sækja þjálfarar hjá viðkomandi sérsamböndum ÍSÍ.  Námið er allt í fjarnámi og þ.a.l. eru engar staðbundnar lotur.

Námið hefur verið afar vinsælt undanfarin ár enda gefur það réttindi sem vottuð eru af Íþrótta- og Ólympíusambandi Íslands.  Vaxandi kröfur eru gerðar í samfélaginu um þekkingu og réttindi íþróttaþjálfara og eru íþróttafélög þessi misserin að auka áherslu og kröfur þessu tengdu enda um að ræða einn stærsta og mikilvægasta þáttinn í starfi félaganna. 

Meðal þess sem kennt er á þessum námskeiðum má nefna íþróttasálfræði, íþróttameiðsl og forvarnir gegn þeim, næringarfræði, siðfræði, heilsufræði, uppbyggingu líkamans og hæfni hans til þjálfunar, gerð mismunandi þjálfunaráætlana, aðferðir við tækniþjálfun, stjórnunaraðferðir o.fl. o.fl. 

Skráning á námskeiðin er á namskeid@isi.is eða í síma 514-4000.  Nemendur á 1. stigi þurfa að hafa lokið grunnskólaprófi.  Nemendur á 2. stigi þurfa að hafa lokið 1. stigi, hafa 6 mánaða starfsreynslu sem íþróttaþjálfarar og hafa gilt skyndihjálparnámskeið, þ.e. að hafa tekið slíkt námskeið á undanförnum 4 árum.  Nemendur á 3. stigi þurfa að hafa lokið 2. stigi, hafa 12 mánaða starfsreynslu sem íþróttaþjálfarar og gilt skyndihjálparnámskið.

Verð:  1. stig kr. 25.000.- og eru þá öll námskeiðsgögn innifalin og send á heimilisföng nemenda.  2. stig kr. 18.000.- og námskeiðsgögn frá 1. stigi notuð áfram ásamt ítarefni.  3. stig kr. 18.000.- og námskeiðsgögn frá 1. og 2. stigi notuð áfram ásamt ítarefni frá kennurum. 

Rétt er að benda á að þjálfarar innan KFÍ og aðrir sem áhuga hafa á að leggja þjálfun fyrir sig, fá námskeiðsgjaldið endurgreitt frá félaginu að námi loknu.

Allar frekari upplýsingar um þjálfaramenntun ÍSÍ veitir Viðar Sigurjónsson Skrifstofustjóri ÍSÍ á Akureyri í síma 460-1467 og/eða á vidar@isi.is

Hörkuleikur gegn Keflavík

Jonni var með sitt pláss á leiknum

Það var hálf lemstrað lið KFÍ sem mætti til leiks í kvöld og vitað að róðurinn yrði þungur gegn frábæru liði frá bítlabænum Keflavík. Fyrir leik var Keflavík með 22 stig í öðru sæti og KFÍ með 6 stig í því ellefta. Áður en leikurinn hófst var mínútu þögn til heiðurs og til að minnast Jóns Kristmannssonar fyrrum formanns KFÍ en hann kvaddi okkur rétt fyrir jól og eftir það voru allir tilbúnir í leik.

Leikurinn var frekar jafn í fyrsta leikhluta en Keflavík á undan með góðum leik Lewis sem er ekki að byrja sinn feril og kann þetta allt. Eftir mikla baráttu fóru piltarnir að sunnan með fjögurra stiga forskot eftir fyrst leikhluta. Staðan 17-21. Keflavík hóf svo annan leikhlutan af krafti og sóknarleikur KFÍ var ekki beittur. Lewis hélt áfram að krafti og leiddi lið Keflavíkur til hálfleiks með tíu stiga forustu, en Josh Brown átti glæsilega þriggja sitga körfu þegar ein sekúnda var eftir af öðrum leikhluta og gerði það að verkum að koma strákunum af Jakanum til tepásunnar með 10 stig.. Lewis var kominn með 17 stig. Craion 6 og Gunnar Ólafsson með 4 stig. Hjá heimamönum var Josh með 9. Mirko 6 og Gústi og Jón Hrafn 4.

Það var eins og eitthvað orkuskot hefði hlaupi í bæði lið í þriðja leikhluta og krafturinn í KFÍ var til staðar.og Josh Brown minnti á sig og skoraði 17 stig í leikhlutanum sem endaði 33-33, en enn voru Keflvíkingar með hendur á stýri. Það var svo allur kraftur úr KFÍ í þem fjórða sem gáfust þó aldrei upp og hentu sér á alla bolta líkt og Keflvíkingar gerðu og var barátta beggja liða til fyrirmyndar.

Svo fór að drengirnir frá Keflavík fóru með sigur með sér af Jakanum. Lokatölur 93-75.

KFÍ liðið verður ekki dæmt af þessu leik. Það hafa verið breytingar hjá liðinu þar sem hinn magnaði Jason Smith fór í sólina til Braselíu og Josh kominn til að taka sæti hans og á eftir að slípast inn í liðið.Josh er þó greinlega frábær leikmaður og á eftir að reynast KFÍ vel. Mirko, Gústi og Jón Hrafn áttu fína spretti og Gummi, Valur og Jói börđust vel. Hjá Keflavík er ekki dónalegt að eiga Lewis og Craion. Þessir tveir eru frábærir og þeir ásamt Gunnari, Val og Arnari Frey eru ekki í vandræðum að gera góða hluti á vellinum. Ungu strákarnir hjá Keflavík fengu dýrmætar minútur og komust vel frá sínu. Og Aron Freyr og Andri settu báðir þrist við mikinn fögnuð þeirra og meðbræðra þeirra af suðurnesjunum.

Stigahæstir hjá Keflavík voru þeir bæður Craion með 32 stig (8 frák.) og Lewis með 25 (12 frák.). Valur bætti við 12 stigum, Gunnar 11 og Arnar Freyr 7.

Hjá KFÍ var Josh með 36 stig. Mirko 16 (15 frák.) og Gústi 13 (5 frák.) og Jón Hrafn 7(9 frák.).

Þeir Sigmundur Herbertsson, Leifur Garðarsson og Rögnvaldur Hreiðarsson dæmdu þennan leik mjög vel.

Og þá byrjar fjörið á nýju ári

Á morgun föstudag kl.19.15 er loks komið að heimaleik hjá okkur og ekki eru andstæðingar af lakari gerðinni en það er piltarnir frá Keflavík sem sitja í öðru sæto deildarinnar og hafa einungis tapað einum leik. Þeir eru með frábært lið og verður gaman að takast á við þá hér á Jakanum. Okkar strákar eru klárir, einhver smá eymsli sem skipta engu máli þegar á völlin er komið.

Eins og allir vita fór Jason í sólina í Brazelíu og er að gera það gott þar og meðala annars kominn á topp fimm lista í tilþrifum. En í hans stað er kominn eðaldrengurinn Josh Brown sem spilaði með KR og er hörkuleikmaður. Hann er þegar búinn að spila tvo leiki með KFÍ og var með 25 stig gegn Njarðvík og 36 gegn Þór.

Það er um að gera að koma snemma og fá sér borgara "A la Muurikka" sem kokkarliðið framreiðir á yndislegan hátt og verður pannan klár með matinn kl.18.30.

Fyrir leikinn verður mínútu þögn til heiðurs og minningar um Jonna formann KFÍ sem kvaddi okkur rétt fyrir jól.

Við viljum fá fólkið okkar á Jakann. Komið og hafið gaman að þessu með okkur.

Og að sjálfsögðu á KFÍ-TV og hefst útsending kl.18.50

Áfram KFÍ

Linda Marín Kristjánsdóttir efnilegust hjá KFÍ 2013

Linda Marín Kristjánsdóttir. Mynd H.Sveinbjörnsson

Mynd. H.Sveinsbjörnsson

1 af 3

Stjórn KFÍ hefur ákveðið að tilnefna Lindu Marín Kristjánsdóttur sem efnilegasta íþróttamann ársins 2013 hjá félaginu.

Linda Marín Kristjánsdóttir er fædd árið 1999. Hún hefur um nokkurra ára skeið æft körfubolta hjá KFÍ og stundað íþróttina af samviskusemi, kappsemi og metnaði. Linda þykir efnileg körfuboltakona og hefur undanfarin tvö ár hefur verið valin í æfingahópa yngri landsliða KKÍ.

Stjórn KFÍ óskar Lindu til hamingju með titilinn og hvetur hana til að stunda körfuboltann áfram af sama metnaði og vera fyrirmynd annarra ungra iðkenda félagsins í leik og starfi.

Tveir tapleikir fyrir sunnan

Strákarnir í KFÍ komu saman í fyrsta sinn allir síðan fyrir jól en veður og færð hafa sett strik í reikning okkar hér eins og víða um land. Eins og allir vita fór Jason frá okkur til Braselíu og í hans stað kom Josh Brown sem spilaði einmitt fyrsta leik sinn gegn Njarðvík þá nýlentur og ósofinn. Frá upphafi leiks var strax farið að sjást hverjir hafa verið í toppæfingu og hverjir ekki og vorum við í eltingaleik. En Biggi þjálfari notaði þennan leik til að leyfa öllum að spila og voru þeir allir með fimmtán mínútur eða meira. Við töpuðum leiknum örugglega en hann fer í bankann fræga sem inniheldur reynslu. Lokatölur 113-64. Josh komst vel frá sínu sem og Valur, en aðrir höfðu hægt um sig. Josh var með 25 stig og Valur lét finna fyrir sér og endaði með 12 stig.

Tölfræðin

Seinni leikur okkar var gegn Þór sem sitja í þriðja sæti og var strax allt annað að sjá til drengjanna og úr varð leikur. Allt var í járnum í fyrri hálfleik og þegar gengið var til hlés var staðan 47-47 og allt opið. En þriðji leikhluti var okkar banabiti en þá náðu Þórsarar að stinga af með 30-14 áhlaupi og þar fór leikurinn.Fjórði leikhlutinn var jafn, en mikið var að minnka muninn og svo fór þessi. Lokatölur 108-90. Josh var góður í leiknum og verður okkur góð viðbót, en núna koma strákarnir til með að æfa stíft og koma drengnum vel inn í öll kerfi. Það er ekki auðvelt að vera saman með strákunum í tvo daga og ætla að læra allt. Josh var með 36 stig, Mirko 13 og 12 fráköst og Gústi með 12 og 12 fráköst. Valur, Gummi og Jón áttu fína spretti. 

Það sem stóð upp úr er að Þór fór á línuna helmingi oftar en við (39 víti en við 21) og létu drengirnir það fara í taugarnar á sér. Það hefur ekkert upp á sig að hugsa um dómarna. Við þurfum að hætta að láta þá hafa áhrif á okkur og koma í hvern leik með því hugarfari að það er ekkert hægt að breyta þessu. Svona er þetta og verður allt tímabilið. Nú er bara að fókusa fram á veginn en næstu tveir leikir eru hér heima sá fyrri gegn Keflavík á föstudag 17. janúar og hefst kl.19.15.

Tölfræðin

Áfram KFÍ

Íþróttamaður ársins 2013 hjá KFÍ - Jón Hrafn Baldvinsson

Það er stjórn KFÍ mikil ánægja og heiður að útnefna Jón Hrafn Baldvinsson íþróttamann ársins 2013 hjá KFÍ og tilnefna hann jafnframt til vals á íþróttamanni Ísafjarðarbæjar 2013.

Eftir frækinn 1. deildarmeistaratitil og þau tvö tímabil sem KFÍ hefur spilað í efstu deild körfuboltans hefur Jón Hrafn Baldvinsson sýnt og sannað að þar fer afreksíþróttamaður og einstakur liðsfélagi.  Enda er hann fyrirliði meistaraflokks og einn þeirra sem draga vagninn fyrir félagið. Helstu einkenni Jóns Hrafns eru sigurvilji og baráttugleði sem hrífa liðsfélaga og alla þá sem hafa fylgst með honum. Hann er máttarstólpi í liði KFÍ og góð fyrirmynd sem fær þá yngri til að leggja harðar að sér á æfingum og í kappleikjum.

Jón Hrafn byrjaði að æfa körfubolta 12 ára gamall í KR, varð 2. deildarmeistari með Laugdælum og 1. deildarmeistari með KFÍ auk spilar meðal þeirra bestu í efstu deild í dag. Jón Hrafn er ávallt tilbúinn að legga sitt af mörkum til félagsstarfs KFÍ og sinna þeim verkefnum sem honum eru falin. Hann vinnur á Endurhæfingardeild heilbrigðisstofnunar Vestfjarða sem er þakklátt og gefandi starf.  Loks má geta þess að Jón Hrafn á ættir að rekja til Hornvíkur þar sem Frímann Haraldsson og Hallfríður Finnbogadóttir, langafi og langamma hans, bjuggu.

Jón Kristmannsson

Jón Kristmannsson ásamt Lúðvík Jóelssyni

1 af 4

Í dag er til moldar borinn mætur Ísfirðingur sem var einn af máttarstólpum ísfirsks körfuknattleiks um árabil. Jón Kristmannsson tók við formennsku í stjórn Körfuknattleiksfélags Ísafjarðar árið 1994 og sinnti því starfi með miklum sóma í áratug, lengst allra formanna félagsins. Undir hans stjórn náði félagið að vinna sig upp í efstu deild og skipaði sér þannig á bekk með bestu liðum landsins. Með Jonna í brúnni komst KFÍ alla leið í úrslit bikarkeppni KKÍ árið 1998 og náði þriðja sætinu í úrvalsdeildinni það árið.

Jonni fylgdi liðinu sínu vel eftir og ávann sér virðingu í heimi körfunnar langt út fyrir raðir KFÍ. Hann stóð með félaginu í gegnum súrt og sætt gegnheill og traustur. Menn minnast stjórnarfundanna heima í stofu hjá Jonna og Huldu á Seljalandsvegi 36 þar sem alltaf var nýbakað með kaffinu. Hann lá ekki á skoðunum sínum ef hann taldi að hægt væri að gera betur enda mikill keppnismaður í íþróttum frá gamalli tíð og líkaði illa að tapa. Handtakið var þétt og sterkt og þegar ákvörðun lá fyrir var henni ekki hnikað. Jonni var sem klettur í starfi félagsins, hann hugsaði vel um sína og væru leikmenn eða stjórnarmenn í vanda var leitað til Jonna sem oftar en ekki leysti úr málum.

Þótt Jonni léti af störfum formanns árið 2004 var hann aldrei langt undan í starfinu enda studdi hann félagið í hvívetna fram á síðasta dag. Hann átti sinn fasta stað á Jakanum, heimavelli KFÍ, og lét sig helst ekki vanta á leiki. Hann vatt sér gjarnan að undirrituðum í hálfleik, fékk fréttir af starfinu og því sem var í vændum og lét ævinlega fylgja með hvatningu og heilræði. Hann brýndi okkur til góðra verka á jákvæðan og uppbyggilegan hátt og fyrir það verðum við ávallt þakklát. Jón Kristmannsson var sæmdur bæði silfur- og gullmerki Héraðssambands Vestfirðinga fyrir framlag hans til íþróttalífs á Ísafirði, einkum dugmikið starf í þágu körfunnar.

Jonna Kristmanns verður sárt saknað af vinum og samferðafólki á Ísafirði en mestur er missirinn fyrir fjölskyldu hans og ástvini. Hugur okkar er hjá þeim á þessum þungbæru tímamótum en fjölskyldan hans Jonna er stór þáttur í starfi félagsins. Áhuginn á körfunni smitaðist til barna og barnabarna og dæturnar og tengdasynirnir hafa verið stoð og stytta í starfi félagsins til margra ára. Við vottum Huldu og fjölskyldunni allri okkar innilegustu samúð um leið og við þökkum samfylgdina við einstakan mann. Minningin um Jonna verður okkur hvatning í starfi um ókomin ár.

Með hinstu kveðju fyrir hönd okkar allra í Körfuknattleiksfélagi Ísafjarðar,

Sævar Óskarsson
formaður stjórnar KFÍ

Æfingar yngri flokka byrja mánudaginn 6. janúar

Flottir KFÍ-krakkar.

Nú er nýtt ár gengið í garð og jólafríið á enda hjá KFÍ-krökkum. Við ætlum að hefja æfingar mánudaginn 6. janúar samkvæmt æfingatöflu. Við hlökkum til að sjá krakkana okkar hressa og káta og tilbúna að takast á við skemmtileg verkefni á nýju ári.

OV styrkir barna- og unglingastarf KFÍ

Kristján Haraldsson, framkvæmdastjóri Orkubús Vestfjarða og Guðfinna Hreiðarsdóttir, gjaldkeri stjórnar barna- og unglingaráðs KFÍ.

Í dag afhenti Orkubú Vestfjarða 29 styrki að upphæð 4,2 m.kr. til ýmissa samfélagslegra verkefna á starfssvæði fyrirtækisins. Barna- og unglingaráð KFÍ var meðal þeirra aðila sem hlaut styrk, alls 250 þús. kr. til að vinna að aukinni þátttöku stúlkna í körfubolta og efla almennan áhuga þeirra á íþróttum. Stjórn barna- og unglingaráðs KFÍ þakkar af heilum hug þennan rausnarlega styrk og stuðning við mikilvægt verkefni.

Um leið og við óskum öllum farsældar á nýju ári, þökkum við sérstaklega þeim sem stutt hafa dyggilega við barnastarfið hjá félaginu með ýmsum hætti og þökkum góðan hug og velvild á árinu sem nú er senn á enda. Gleðilegt nýtt ár!

Joshua Brown til KFÍ

Josh Brown. Mynd: Karfan.is

Joshua Keith Brown er leikstjórnandi upp á 183 sentimetra sem kemur til okkar frá efstu deildinni í Kosovo þar sem hann var með 19 stig í leik 4 fráköst og 4 stoðsendingar, en þar á undan var kappinn með KR hér heima og spilaði vikrilega vel með því fína félagi. Eftirfarandi fengum við frá KR síðunni og var sett inn þegar hann kom þangað í janúar í fyrra;

,,Ferill hans er ansi áhugaverður að því leyti að um langt skeið leit alls ekki út fyrir að hann myndi enda í atvinnumennsku. Eftir tvö ár í Mount Olive háskólanum í annarri deildinni í Bandaríkjunum þar sem Josh skilaði ágætis verki tók hann upp á sitt einsdæmi þá ákvörðun að ganga í Towson State háskóla í heimafylki sínu upp á von og óvon í þeim tilgangi að koma sér í körfuboltalið skólans, nokkuð sem er algerlega fáheyrt í fyrstu deildar háskóla í eins sterkri deild og CAA deildin er.  Í stuttu máli gekk það eftir í kjölfar þrotlausrar vinnu og mikillar frekju hjá okkar manni og á endanum var Josh orðinn byrjunarliðsmaður á sínu síðasta ári.  Eftir mikið erfiði í sumar, þar sem okkar maður ferðaðist milli sumardeilda til að sanna sig móti hverjum atvinnumanninum á fætur öðrum, kom kallið frá Dinamo Bucharest og síðan hefur boltinn farið almennilega að rúlla.  Josh kemur til okkar eftir að hafa skilað 21.5 stigum, 5.6 fráköstum og 4.9 stoðsendingum að meðaltali í leik í sterkri deild í Rúmeníu".

Við bjóðum Josh velkominn í KFÍ og okkur hlakkar til að sjá kappann á Jakanum

Hér eru klippur frá Josh frá Towson State