Vetrarstarfið að byrja

Verið er að leggja lokahönd á æfingatöflu yngri flokka KFÍ og er stefnt að því að æfingar hefjist seinnipartinn í þessari viku. Þau allra yngstu hefja leikinn fyrst allra því æfingar í Krílakörfunni hefjast nú á miðvikudaginn, 4. september í íþróttahúsinu að Austurvegi kl 16.05. Sigríður Guðjónsdóttir, íþróttafræðingur og körfuboltakona, hefur umsjón með Krílakörfunni í vetur og eru allir krakkar á aldrinum 4-5 ára, jafnt stelpur sem strákar, hvattir til að kíkja og spreyta sig í körfu. Markmiðið með Krílakörfunni er að efla hreyfiþroska og boltafærni barnanna í gegnum skemmtilega leiki og einfaldar körfuboltaæfingar.

Pavle Veljkovic á leið til KFÍ

Mirko er að koma heim

KFÍ hefur komist að samkomulagi við ungan leikstjórnanda frá Serbíu að nafni Pavle Veljkovic um að koma og spila með félaginu í vetur. Þetta er strákur fæddur ´92 og kemur hingað með Mirko og Jason í næstu viku. Þetta er enn ein viðbótin í hóp KFÍ og fögnum við þessu mjög. Nú fer að styttast í að tímabilið byrji og verður frétt um liðið og tímabilið sett inn á sunnudaginn þar sem við kynnum það sem framundan er. En það er búið að setja inn leikina hjá KFÍ í Lengjubikarnum inn hér til hægri á síðunni og byrjum við keppni hér heima n.k. föstudagskvöld 6 .september með leik gegn Stjörnunni.

Hér er myndband af Pavle

Áfram KFÍ

Æfingatafla KFÍ alveg að verða tilbúin – æfingar hefjast í næstu viku.

Gaman í körfu

Þessa dagana er unnið að því innan HSV að setja saman tímatöflu í íþróttahúsunum á Ísafirði þar sem íþróttafélögin skipta með sér þeim takmörkuðu gæðum sem tímar í húsunum eru.  Þar sem HSV taflan er enn í vinnslu getur KFÍ ekki lokið við gerð æfingatöflu félagsins en vonast er til að þeirri vinnu ljúki á allra næstu dögum. Stefnt er að því að æfingar allra aldursflokka hefjist í næstu viku og verður æfingataflan birt hér á heimasíðunni okkar um leið og hún er tilbúin.

Unglingaráð

Enginn meistaraflokkur kvenna í vetur

Það er mikil eftirsjá af stelpunum en koma tímar, koma ráð

Eftir nokkur frábær ár hjá meistaraflokki kvenna KFÍ, sem keppt hefur í 1. deild með eftirtektarverðum árangri, hefur sú ákvörðun verið tekin af stjórn félagsins að tefla ekki fram meistaraflokki kvenna til keppni í vetur. Margar þeirra stúlkna sem hafa verið burðarás liðsins undanfarin tímabil hafa ýmist lokið skólagöngu hér á Ísafirði eða snúið til starfa á öðrum vettvangi. Stjórn KFÍ færir stúlkunum sem skipað hafa meistaraflokk kvenna undanfarin ár bestu þakkir fyrir öflugt starf og óskar þeim gæfu og góðs gengis í öllu því sem þær taka sér fyrir hendur.

Í íþróttafélögum í minni samfélögum á landsbyggðinni getur nýliðun verið afar misjöfn milli ára og er óhætt að fullyrða að aðstöðumunur félaga á höfuðborgarsvæðinu annarsvegar og á landsbyggðinni hinsvegar sé gríðarlegur. Hjá KFÍ er staðan sú að nokkur bið verður nú á því að nægilega stór hópur stúlkna komi upp í meistaraflokk félagsins. KFÍ mun þó hér eftir sem hingað til bjóða upp á körfuknattleiksæfingar fyrir stúlkur og er vetrarstarfið óðum að taka á sig mynd. Unnið er að tímaúthlutun í íþróttahúsum á vegum HSV og munu æfingatöflur liggja fyrir innan nokkurra daga.

Sævar Óskarsson

Formaður

Ágúst Angantýrsson í raðir KFÍ

Ágúst fann á sér að hann væri á leiðinni þegar hann spilaði í KFÍ búning gegn okkur s.l. vetur

Þær góðu fréttir voru að berast kfi.is að hinn mjög svo geðþekki og góði drengur Ágúst Angantýrsson væri búinn að ganga frá samning við okkur og spilar með okkur í vetur. Þetta eru mjög góðar fréttir fyrir félagið en við vitum hvaða mann þessi strákur hefur að geyma og bjóðum hann hjartanlega velkominn í félagið. Ágúst hefur verið á mála hjá KR en hann er Vestfirðingur að upplagi frá Þingeyri þannig að hann er að koma heim að spila.

Það eru fleiri fréttir að berast í hús á næstu dögum og verðum við með allt klárt fyrir veturinn. Hér er hlekkur á góð tilþrif frá Gústa

Áfram KFÍ

Gautur Arnar skrifar undir

Enn eru strákarnir að skrifa undir og núna er það Gautur Arnar sem setti sitt nafn á pappírinn góða. Við verðum með fréttir næstu daga um fleiri kvittanir en drengirnir eru að týnast heim eftir vinnutarnir og frí. 

Áfram KFÍ

Strákarnir skrifa undir

Jón Hrafn með Bigga þjálfara og Sævari formanni

Óskar kampakátur

Leó er klár í slaginn

Hákon ætlar sér að fá mínútur!

Nonni er nagli

1 af 5

Þá erum við komnir á skrið. Strákarnir okkar skrifuðu undir nýja samninga við KFÍ og erum við á leið í góða vegferð með Bigga þjálfara og er von á fleiri góðum fréttum innan fárra daga. Þeir sem settu penna á blað í kvöld voru þér Leó Sigurðsson, Jón Hrafn Baldvinsson, Óskar Kristjánsson, Jón Kristinn Sævarsson og Hákon Halldórsson.

Áfram KFÍ

Hraunar Karl Guðmundsson í KFÍ

Hraunar ásamt Sævari formanni og Birgir Erni þjálfara

Nú fyrir stundu gekk Hraunar Karl Guðmundsson til liðs við okkur í KFÍ. Hraunar lék undir stjórn Borce okkar í Breiðablik í haust og erum við kampakát yfir að fá þennan eðaldreng í okkar raðir. Hann var með 13 stig, 3 fráköst og 3 stoðsendingar síðasta vetur með Blikum og er feykilega duglegur drengur.

Við erum að safna liði og væntum frekari frétta á næstu dögum. En eins og við sögðum dropinn holar steininn.

Við bjóðum Hraunar innilega velkominn í KFÍ.

KFÍ semur við Jason Anthony Smith

KFÍ hefur gengið frá samning við leikstjórnanda að nafni Jason Anthony Smith. Jason hefur mikla reynslu sem leikmaður og spilaði nú síðasta vetur í efstu deildinni í Portúgal með liði CAB Madeira. Þar á undan spilaði hann í Þýskalandi með liði Schwelmer Basket í pro-B deildinni. Hjá CAB var hann með 16 stig og 5.3 stoðsendingar a.m.t í leik og stigahæstur í liðinu og hjá Schwelmer var hann með 19 stig og 4.5 stoðsendingar.

Jason er mikil skytta og með frábæra nýtingu í skotum sínum og er einnig góður að leika uppi félaga sína og er mikill leiðtogi.

Hér eru hlekkir á drenginn frá Þýskalandi og Portúgal

Við vonumst til að geta verið með fleiri fréttir af liðinu þegar líða tekur á vikuna, en allt er gert til að tefla fram góðu liði í Dominosdeildina næsta vetur og dropinn holar steininn.

Mjög góður fundur með stjórn KKÍ

Stjórn körfuknattleikssambands Íslands setti í ferðagírinn og komu hingað til viðræðna við stjórn KFÍ og HSV. Fundurinn var haldinn í stjórnsýsluhúsinu á Ísafirði. Fyrst fundaði stjórn KKÍ um mál sambandsins og þar á eftir var komið að fundi með KFÍ. Sá fundur var góður og gagnlegur og stóð í tvo tíma. Þegar þessum fundi lauk kom svo Pétur Markan framkvæmdarstjóri HSV til fundar og var með gott innlegg á fundinn. Það sem er auðvitað helsta baráttumál okkar á landsbyggðinni er ferðakostnaður og hvað er hægt að gera til að lækka þann kostnað. Sú umræða þarf að opnast og er okkar von að sérstök nefnd verði sett á laggirnar sem fari í að sjá hvað er hægt að gera til að lækka þennan kostnað sem er satt best að segja að setja hömlur á þáttöku liða af landsbyggðinni. Þetta er hagmunarmál allra í íþróttafélaganna innnan UMFÍ og ÍSÍ og það hlýtur að vera kappsmál að halda á lofti slagorðunum ,,íþróttir eru fyrir alla".

Það er gríðarlega mikilvægt að fá svona fundi í héraðið og er oft sagt að betur sjá augu en auga og það á vel við hér. Við þökkum stórn KKÍ kærlega fyrir góðan fund og einnig Pétri Markan sem er að standa sig vel í starfi framkvæmdarstjóra HSV.