Aðalfundur Boltafélags Ísafjarðar 2015

Aðalfundur Boltafélags Ísafjarðar verður haldinn fimmtudaginn 5. nóvember næstkomandi kl. 20:30 á Hótel Ísafirði.

Þrír efnilegir framlengja samning

Félagið framlengdi samninga við þrjá unga og efnilega leikmenn í síðustu viku. Þeir Elmar Atli Garðarsson, Viktor Júlíusson og Pétur Bjarnason skrifuðu þá allir undir nýjan samning. Þeir spiluðu stórt hlutverk síðasta sumar í 1.deildinni og ættu því að vera vel sjóaðir fyrir átökin í 2.deild næsta sumar.

Búast má við fleiri fréttum af samningamálum á næstunni þar sem von er á að framlengja við fleiri uppalda leikmenn.

Ásgeir tekur við meistaraflokki karla.

BÍ/Bolungarvík hefur samið við Ásgeir Guðmundsson um að taka við þjálfun meistaraflokks karla í knattspyrnu. Ásgeir hefur áður komið að þjálfun liðsins. Hann var aðstoðarmaður Guðjóns Þórðarsonar árið 2011 og síðan aðstoðarmaður hjá Jörundi Áka Sveinssyni næstu þrjú ár þar á eftir. Í sumar tók Ásgeir sér frí frá þjálfun en ætlar að taka slaginn á næsta ári í 2. deild.

Ásamt þessari ráðningu er félagið einnig í viðræðum við erlendan þjálfara sem mun þá starfa við hlið Ásgeirs. Félagið reiknar með að tilkynna það fljótlega ef að verður.

Þráinn í landsliðsúrtak U-16

Þær góðu fréttir komu frá KSÍ að Þráinn Arnaldsson markvörður BÍ/Bolungarvík í 3.flokki karla var valinn til að taka þátt í úrtaksæfingum fyrir U-16 ára landslið Íslands.  Þetta er frábær árangur hjá Þránni sem hefur staðið sig gríðarlega vel hjá BÍ/Bolungarvík.  Þráinn er góð fyrirmynd annara og mjög duglegur að æfa.

Jónas ráðinn yfirþjálfari yngri flokka BÍ/Bolungarvík

Jónas Leifur Sigursteinsson hefur tekið við yfirþjálfarastöðu í barna- og unglingaflokkum BÍ/Bolungarvík. 

Fjögur frá BÍ/Bolungarvík á hæfileikamótun KSÍ og N1

Hæfileikamót KSÍ og N1 fyrir leikmenn í 4.flokki karla fór fram í Kórnum í Kópavogi um nýliðna helgi. Halldór Björnsson yfirmaður hæfileikamótunar sá um mótið og voru 92 einstaklingar boðaðir.  BÍ/Bolungarvík átti hvorki fleiri né færri en 3 stráka, þá Þórð Hafþórsson, Þráinn Arnaldsson og Guðmund Svavarsson.  Líkt og áður hefur komið fram á heimasíðunni fór Lára Ósk Albertsdóttir í september fyrir stelpur á sama aldri.

Í sumar ferðaðist Halldór Björnsson um landið með Hæfileikamótun KSÍ og N1 og vann með krökkum á öllu landinu á æfingum.  Halldór kom tvisvar á Ísafjörð í sumar og er þetta mót framhald af þeirri vinnu.  Halldór var mjög ánægður með alla krakkana sem mættu og voru fleiri nálægt því að komast inn á þetta mót.  Við óskum krökkunum okkar til hamingju með flottan árangur.

Lára Ósk á hæfileikamót KSÍ

Hæfileikamót KSÍ og N1 fór fram í Kórnum í Kópavogi um nýliðna helgi. Úlfar Hinriksson þjálfari U-17 kvenna og Halldór Björnsson yfirmaður hæfileikamótunar sáu um mótið og var Lára Ósk Albertsdóttir leikmaður 4.flokks BÍ/Bolungarvíkur boðuð á mótið.

Undanfarið hefur Halldór Björnsson ferðast um landið með Hæfileikamótun KSÍ og N1 og er þetta mót framhald af þeirri vinnu. Um er að ræða leikmenn sem eru í 4. flokki, 13 til 14 ára, og hafa þeir mætt á æfingar og fengið annan fróðleik í gegnum Hæfileikamótun KSÍ og N1.

Við óskum Láru til hamingju með flottan árangur. Lára er mjög duglega að æfa og missir varla úr æfingu. Hefur það án efa átt hlut í þessum árangri.

Íslandsbanki og yngri flokkar BÍ/Bolungarvík í samstarf

Í maí sl. gerðist Íslandsbanki einn helsti bakhjarl yngri flokka BÍ/Bolungarvík. Var skrifað undir samning þess efnis í útibúi Íslandsbanka á Ísafirði. Samningur þessi styrkir stoðir yngri flokka félagsins og gerir félaginu kleift að halda úti öflugu yngri flokka starfi.

Æfingatafla fyrir sumarið 2015

Æfingatafla fyrir sumarið 2015 tekur gildi mánudaginn 8.júní nk. Töfluna er einnig að finna hér: http://hsv.is/bi/aefingatafla/skra/101/

Rannveig Hjaltadóttir á skotskónum í 3-1 sigri á Keflavík

Rannveig Hjaltadóttir skoraði eitt marka ÍR/BÍ/Bolungarvík í 3-1 sigri liðsins á Keflavík í dag en leikurinn fór fram á Hertz vellinum í Reykjavík.