BÍ/Bolungarvík - Tindastóll/Hvöt

Knattspyrna | 12.12.2010 BÍ/Bolungarvík tók á móti nýsameinuðu liði, Tindastól/Hvöt síðastliðinn laugardag. Leikmenn voru mættir um kl.11 upp á skaga og við tók djús og ristað brauð. Eftir það var töflufundur og síðan hófst leikurinn kl.13. Í markinu lék markmaður sem við fengum lánaðan frá ÍA í leikinn.

Byrjunarliðið var þannig skipað:
Lánsmðaur - Sigþór, Sigurgeir, Atli, Haffi - Gunnar Már, Sölvi, Alexander - Matti, Óttar og Andri.
Á bekknum sátu þeir Ásgeir Guðmunds, Axel Lárusson og Arnór Þrastarson.

Við byrjuðum leikinn mun betur og vorum fljótlega komnir í 1-0 eftir laglega sókn. Matti átti þá góða fyrirgjöf frá hægri sem Gunnar Már skallaði laglega í netið. Tindastóll/Hvöt voru sprækir um miðbik hálfleiksins og áttu margar flottar sóknir. Þeir sköpuðu samt enga verulega hættu fyrir framan mark okkar. Dómarinn gaf þeim þó vítaspyrnu sem var vægast sagt ódýr en markmaðurinn okkar varði vítið auðveldlega. Staðan 1-0 í hálfleik.

Seinni hálfleikur einkenndist af mikilli baráttu og lítið um fallegar sóknir. Við náðum þó að komast í 2-0 eftir skyndisókn um miðjan hálfleikinn. Aftur var það Matti sem gaf fyrir markið og á fjærstöng var Arnór Þrastarson mættur og skoraði örugglega. Í lokin náðu Tindastóll/Hvöt að setja smá pressu á okkur, þeir voru með mun stærri hóp og við orðnir þreyttir að mæta óþreyttum leikmönnum. Þeir minnkuðu muninn í lokin og þar við sat. 2-1 sigur staðreynd.

Þetta var góður sigur þó spilið hafi verulega höktað. Eftir að við komumst mjög snemma yfir í leiknum, eftir að hafa stjórnað honum, þá var eins og menn hafi slappað af og haldið að hlutirnir gerðust að sjálfu sér. Sigurinn var þó fyllilega sanngjarn og ef menn hefðu spilað eins og menn allan leikinn hefðum við unnið mun stærri sigur. Tindastóll/Hvöt voru sprækir en spurning er hvort lið þeirra er nógu gott í 2.deild. Heyrst hefur að þeir séu einnig að reyna sameinast Kormáki frá Hvammstanga, Smárinn frá Varmahlíð og Neista Hofsósi. Mun það verða fyrsta liðið sem tekur þátt á íslandsmóti og inniheldur fjögur skástrik í nafni liðsins, Tindastóll/Hvöt/Kormákur/Smárinn/Neisti. Nánar

BÍ/Bolungarvík - Leiknir

Knattspyrna | 04.12.2010 BÍ/Bolungarvík tók á móti Leikni Reykjavík á Akranesi kl.13 í dag. Fyrir viku síðan töpuðu okkar menn illa fyrir ÍA en leikurinn var þó góð kennslustund. Menn tóku daginn snemma og voru komnir upp á skaga kl.11 þar sem Gaui reiddi fram ristað brauð og ávexti. Eftir að menn höfðu fengið næringu var komið að töflufundi þar sem Guðjón tók varnarleikinn í gegn hjá okkar mönnum og sýndi þeim nokkur grunnatriði í varnarleik. Tveir nýjir leikmenn tóku þátt í leiknum sem ekki hafa verið með okkur áður. Þetta voru þeir Tórður Thomsen markmaður sem spilaði seinast með færeysku meisturunum í HB og Alexander Veigar Þórarinsson sem spilaði í sumar með Fram. Einnig lék Birkir Halldór Sverrisson fyrsta leik sinn með okkur eftir nokkurt hlé en hann hóf æfingar fyrir stuttu.

Byrjunarliðið var þannig skipað:
Tórður Thomsen - Haffi, Atli Guðjónsson, Birkir, Sigurgeir - Sigþór, Gunnar Már, Sölvi Gylfason, Arnór Þrastarson, Alexander Veigar Þórarinsson - Andri Rúnar.
Á bekknum sátu þeir Guðni Páll, Ásgeir Guðmunds, Axel Lárusson og Óttar.

Við mættum mun betur stemmdir til leiks heldur en á móti ÍA, þó svo að Leiknir hafi verið mikið mun meira með boltann þá voru menn að spila mjög þéttan varnarleik, fóru á fullu í návígi og ekkert gefið eftir. Leikinsmenn náðu nokkrum sinnum að skapa sér álitlegar sóknir sem annað hvort stoppuðu á Birki og Atla eða Tórði í markinu sem var mjög öflugur í dag. Ólíkt við leikinn í síðustu viku þá voru við að ná að brjóta niður margar sóknir Leiknismanna en tókst illa að gera eitthvað marktækt við boltann þegar að því kom. Þó áttum við 2-3 tækifæri og með smá heppni hefðum við getað skorað úr einu þeirra. 0-0 í hálfleik.

Í seinni hálfleik þá skiptum við varamönnunum inn á og "róteruðum" á 15 mín. kafla á meðan Leiknismenn voru með mun stærri hóp en við í leiknum. Það fór að liggja vel á okkur um miðbik hálfleiksins en flest allar fyrirgjafir og skot stoppuðu á Tórði. Leiknismenn náðu þó góðri sókn þegar um tuttugu mínútur voru eftir og skoruðu laglegt mark eftir flott spil, staðan 0-1. Eftir það átti Tórður stórbrotna markvörslu frá einum leikmanni Leiknis úr dauðafæri. Síðustu tíu mínúturnar fór töluvert að losna milli miðju og varnar hjá Leikni og áttum við nokkra "sénsa" á að sækja hratt á þá en lítið gekk. Það var síðan á 90. mínútu þegar Andri Rúnar kemst í stöðuna "einn á einn" á móti varnarmanni í vítateignum. Andri tekur fjögur skæri í öðru veldi og fer leiftursnöggt til hliðar og skilur varnarmanninn eftir á hælunum sem þó reynir að ná til boltans en fellir Andra klaufalega. Vítaspyrna dæmd og Andri steig sjálfur á punktinn og skoraði af miklu öryggi. Stuttu seinna flautaði dómarinn til leiksloka og lokatölur 1-1.

Ágætis leikur í dag hjá okkur þó sóknarleikurinn sé ekki alveg kominn í gang. Það má segja að jafnteflið hafi verið sanngjörn úrslit og eru þessir leikir að nýtast okkur mjög vel í undirbúningi fyrir sumarið. Liðið lék mun betur heldur en í síðustu viku þó færin hafi verið betri fyrir viku. Áætlað er að spila við Tindastól/Hvöt á næsta laugardag. Nánar

Jólafríið skollið á

Knattspyrna | 02.12.2010 Þá er komið jólafrí eins og flestir vita en við höfum gert þetta undanfarin tvö ár. Áður var alltaf frí í september en við ákváðum að nota tímann frekar þá, vera úti og æfa eins mikið og við gætum en taka fríið í desember enda hefur alltaf komið truflun á starfið í jólamánuðinum vegna annars frís, hátíðisdaga, lokunardaga í íþróttahúsunum og ferðalaga fjölskyldna.
Æfingar hefjast svo aftur um leið og skólinn hefst eftir jólafrí og þá ættu allir að vera endurnærðir og vel saddir eftir hátíðarnar. Við viljum samt benda ykkur á að nú er kjörið að fara út á sparkvöll og leika sér í fótbolta, það þarf enginn að láta sér leiðast þó að æfingar séu ekki í gangi í mánuðinum... Nánar

Viðtal við Guðjón á fotbolti.net

Knattspyrna | 02.12.2010 Guðjón Þórðarsson þjálfari liðsins var í viðtali á fotbolti.net fyrr í dag. Í viðtalinu ræðir hann um hópinn sem hann hefur í höndunum og næstu skref í leikmannamálum.

Viðtal við Guðjón Nánar

ÍA - BÍ/Bolungarvík

Knattspyrna | 30.11.2010 Heimamenn á Akranesi tóku á móti okkar mönnum síðastliðinn laugardagsmorgun. Um æfingarleik var að ræða en þó var fjölmennt í stúkunni, bæði af heimamönnum og stuðningsmönnum okkar. Hópurinn var og hefur verið þunnskipaður undanfarna mánuði og höfðum við því einungis úr 14 leikmönnum að velja.

Byrjunarliðið var þannig skipað:
Robbi(M)  -  Haffi, Atli Guðjónsson, Sigurgeir, Sigþór  -  Axel Lárusson, Sölvi Gylfason, Gunnar Már  -  Óttar, Matti og Andri. Á bekknum sátu Ásgeir, Arnór Þrastarson og Runólfur(M)

Skagamenn tóku undirtökin strax frá byrjun og hófu leikinn mjög ákveðnir. Þeir skoruðu fyrsta markið eftir tíu mínútur eftir klaufaleg mistök í vörninni hjá okkur. Þeir bættu síðan stuttu seinna öðru markinu við og var það önnur gjöf frá okkur. Skaginn braut allar sóknir okkar niður með brotum, voru mjög "aggressívir" og spiluðu á mun hærra "tempói" en okkar menn eru vanir. Þegar hálfleikurinn var hálfnaður og við að ná áttum þá slapp Andri aleinn í gegnum vörn ÍA eftir laglega stungusendingu. Hann hinsvegar lét markmann ÍA verja frá sér en hann hafði komið mjög langt út á móti Andra. ÍA voru nánast allan tímann með boltann en náðu þó ekki að skapa sér nein opin marktækifæri þó spil þeirra hafi verið mjög gott. Atli átti skalla hjá okkur sem var varinn á línu af varnarmanni ÍA eftir hornspyrnu. Staðan 2-0 fyrir ÍA í hálfleik en það hefði ekki verið ósanngjarnt ef við hefðum sett eitt mark á þá.

Í seinni hálfleik áttum við gjörsmalega ekki neitt erindi í leikinn. ÍA skiptu mörgum mönnum inn á meðan við reyndum að rótera okkar þrem aukamönnum á 15.mín fresti. ÍA átti hálfleikinn frá A til Ö en náðu þó einungis að skora eitt mark. Það kom eftir að brotið hafði verið á Sigurgeiri í vörninni en dómarinn tók upp á því að dæma ekki nokkurn skapaðan hlut og eftirleikurinn auðveldur fyrir ÍA. Það lá töluvert á okkar marki síðustu mínúturnar en lokatölur urðu 3-0.

Þessi leikur gefur okkur til kynna hvað bíður okkar næsta sumar. Leikir spilaðir á mun meiri hraða og mun betri leikmenn heldur en í 2.deild. Þó við höfum ekki átt mikið í leiknum þá er þetta góð reynsla fyrir strákanna og Gaui sér einnig um leið hvað þarf að bæta. Nú þarf að nýta næstu mánuði vel í lyftingar og æfingar. Auðvelt er að segja að flestir hafi spilað undir getu í leiknum en eins og máltakið segir, þá spilar maður ekki betur en andstæðingur leyfir. Ef einhvern á að nefna "bestan" í okkar liði að þá var Sigþór Snorrason með okkar bestu mönnum. Baráttan var til fyrirmyndar hjá honum og varnaleikurinn ágætur þótt nokkrar sendingar hefðu ekki skilað sér á liðsfélaga.

Hvað ÍA liðið varðar að þá áttu þeir mjög góðan leik og litu ágætlega út. Þeir verða hinsvegar að gera eitthvað róttækt í sínum málum ef þeir ætla upp um deild því þetta lið má muna sinn fífil fegurri miðað við liðið sem lék á gullaldarárum félagsins. Íbúar á Akranesi geta þó huggað sig við það að þeir eru komnir áfram í spurningaþættinum Útsvar. Þeir lögðu Fljótsdalshérað glæsilega síðastliðið föstudagskvöld, lokatölur 99-42. Nánar

BÍ/Bolungarvík og Vífilfell gera með sér samstarfssamning.

Knattspyrna | 18.11.2010 BÍ/Bolungarvík og Vífilfell hf. undirrituðu nú í dag með sér samstarfssamning til þriggja ára. Vífilfell verður með samningnum einn helsti bakhjarl BÍ/Bolungarvíkur og styður þannig við öflugt starf félagsins í meistaraflokki. Vífilfell hefur í gegnum árin starfað náið með íþróttahreyfingunni í landinu og er bakhjarl fjölmargra íþróttafélaga og -hreyfinga. Vífilfell kappkostar að bjóða upp á breiða flóru drykkjavara, m.a. fjölbreytt úrval vatns, safa og próteindrykkja, sem henta einkar vel íþróttafólki.
 
 „Við erum virkilega ánægðir með samninginn og berum miklar væntingar til samstarfs við jafn öflugt fyrirtæki og Vífilfell. BÍ/Bolungarvík er metnaðarfullt íþróttafélag og sá öflugi stuðningur sem félagið fær með samstarfi þessu er okkur mjög mikilvægur. Við erum vissir um að samstarfið verður gæfuríkt fyrir báða aðila." sagði Samúel Samúelsson, stjórnarmaður hjá BÍ/Bolungarvík. 

Á meðfylgjandi mynd má sjá Árna Stefánsson, forstjóra Vífilfells, og Samúel Samúelsson, stjórnarmann, við undirritunina í höfuðstöðvum Vífilfells í dag. Nánar

Öll ljós kveikt og engin heima?

Knattspyrna | 17.11.2010 Þá eru einungis einn dagur í stuðningsmannakvöldið. Við hvetjum fólk eindregið til að mæta og hafa gaman saman. Mikið af fólki sem er "maybe attending" eða "havent replied" ennþá(Þeir sletta skyrinu sem eiga það) þannig að við ætlum að minna aðeins á dagskránna.

Grillið á Players lokar kl. 21. Borgari og bjór á 1500 kr. og stakur bjór á 500 kr.

Boðið verður upp á rosalegt fótbolta quiz, spurningar frá allt að BÍ/Bolungarvík yfir í Enska boltan. Verðlaun veitt sigurliðinu.

Biggi Olgeirs er búinn að suða saman all svakalegt söng program og mun þakið væntanlega rifna af Players.

Eru ekki allir búnir að skrá sig veika á föstudaginn???? Nánar

Stefán Arnalds ráðinn aðstoðarþjálfari

Knattspyrna | 05.11.2010 Stefán Arnalds hefur verið ráðinn aðstoðarþjálfari BÍ/Bolungarvíkur. Stefán sem er uppalinn í Bolungarvík lék á árum áður bæði með meistaraflokk UMFB og BÍ. Stefán er íþróttakennari að mennt og hefur um árabil verið virkur í þjálfun yngri flokka og meðal annars þjálfað nokkra að núverandi leikmönnum BÍ/Bolungarvík. Stefán er einn af fyrstu íslendingunum sem útskrifuðust með UEFA A þjálfaragráðu sem er hæsta þjálfaragráða sem er í boði á Íslandi.´
 

Aðspurður segir Stefán að ekki hafi verið hægt að segja nei þrátt fyrir að hann hafi ekki tekið að sér þjálfun í nokkur ár. "Tilfinningin segir mér að þetta verkefni eigi eftir að ná góðu flugi og ég vill verða partur af því" .

Gaman er að segja frá því að Stefán er hvað frægastur fyrir að hafa komið Bolvíkingum yfir á móti ÍA, þáverandi Íslandsmeisturum í knattspyrnu, í vígsluleik Skeiðsvallar í Bolungarvík árið 1995. 

Nánar

Ísfirðingur og Bolvíkingur að tala saman...

Knattspyrna | 02.11.2010

Á vefnum ibs.is er að finna myndband af skemmtilegu viðtali við Matta Villa og Kristján Jónsson blaðamann á Morgunblaðinu. Þar eru þeir spurðir út í lið þeirra "skástrikið" ásamt fleiru.

Viðtalið (Videospilari til hægri, merkt BÍ og Bolungarvík)

Nánar

Grótta - BÍ/Bolungarvík

Knattspyrna | 01.11.2010 BÍ/Bolungarvík tók á móti Gróttu á Seltjarnarnesi síðastliðinn laugardagsmorgun. Hluti af hópnum sem er fyrir vestan gerði sér ferð í bæinn til að spila leikinn og ná einni æfingu á sunnudeginum með Guðjóni. Það var heiðskýrt en mjög hvasst á Gróttuvelli og byrjuðu við á móti vindi. Sex nýir leikmenn hafa verið að æfa með liðinu að undanförnu og tóku fimm þeirra þátt í æfingarleiknum.

Byrjunarliðið var þannig skipað:
Róbert - Haffi, Atli Guðjónsson, Sigurgeir, Sigþór - Pétur Run, Gunnar Már, Sölvi Gylfason - Óttar, Matti, Andri

Á bekknum voru Ásgeir Guðmunds, Pétur Geir, Vilhjálmur Darri Einarsson, Leó Daðason, Arnþór Ingi Kristinsson og Dóri Skarp.

Fjarverandi voru Birkir, Addi, Goran og Arnór Þrastarson

Við vorum til að byrja með svolítið stressaðir og á móti mjög sterkum vindi en eftir fyrstu 5-10 mínúturnar fórum við að láta boltann ganga í vörninni og hefja góðar sóknir líkt og liðið gerði í sumar. Þegar menn róuðu sig á boltanum að þá komu oft frábærir spilakaflar sem sköpuðu góð færi. Andri Rúnar skoraði fyrsta markið eftir góða stungusendingu frá Óttari. Gunnar Már bætti síðan öðru markinu stuttu seinna eftir að hann og Óttar sundurspiluðu Gróttumenn á vinstri kantinum. Grótta fékk tvö eða þrjú hálffæri á fyrsta hálftímanum en síðan náðu þeir ekki að opna okkur og sköpuðu sér ekkert eftir það. Pétur Geir kom inn á í hálfleik og það var liðin mínúta af þeim seinni þegar Pétur Run vinnur boltann og er fljótur að stinga inn á Pétur Geir sem tekur boltann í fyrstu snertingu framhjá markmanninum sem var kominn út á móti. Eftir þetta fórum við að skipta inn á og menn komu aftur inn á þannig að spilið riðlaðist aðeins. Við héldum þó boltanum vel en sköpuðum okkur nokkra góða "sénsa" en ekkert sem vert er að minnast á. 0-3 sigur staðreynd í fyrsta leik liðsins fyrir tímabilið 2011.

Liðið spilaði flottan bolta á köflum og þá sérstaklega í fyrri hálfleik. Það vantar þó hjá okkur að halda boltanum betur á síðasta þriðjungi vallarins og fá ró á boltann þar. Þurfum að halda boltanum betur þar og færa leikmennina framar á völlinn. Annars var þetta með því betra sem við höfum sýnt í fyrsta leik miðað við síðustu ár. Framundan er mikil vinna hjá strákunum, þeir eru í þrusu "programmi" hjá Guðjóni sem ætlar að vera með formið og skipulagið á hreinu í sumar. Nánar